වයස අවුරුදු 50 සහ ඊට වැඩි වැඩිහිටියන් සඳහා ලොව ප්‍රථම වරට mRNA-පාදක සාමාන්‍ය සෘතුමය උණ එන්නත සඳහා අමෙරිකානු ආහාර හා ඖෂධ පරිපාලනය විසින් නිල අනුමැතිය ලබා දී තිබේ.

විද්‍යාඥයන් පෙන්වා දෙන පරිදි, මෙම නව තාක්ෂණය මඟින් එන්නත් යාවත්කාලීන කිරීමේ ක්‍රියාවලිය වේගවත් කිරීමටත්, විකෘති වන ඉන්ෆ්ලුඑන්සා වෛරස්වලට එරෙහිව වැඩි ආරක්ෂාවක් ලබා ගැනීමටත් හැකි වනු ඇත.

මෝඩර්නා (Moderna) සමාගම විසින් සංවර්ධනය කරන ලද 'mFlusiva' නම් මෙම එන්නත, COVID-19 වසංගත සමයේ දැඩි ලෙස ජනප්‍රිය වූ mRNA තාක්ෂණය සාමාන්‍ය සෘතුමය උණ වැළැක්වීම සඳහා අනුමත කරන ලද පළමු අවස්ථාව ලෙස ඉතිහාසගත වේ.

ඉන්ෆ්ලුඑන්සා වෛරස් නිරන්තරයෙන් විකෘති වන බැවින්, සෑම වසරකම එන්නත් යාවත්කාලීන කිරීම අත්‍යවශ්‍ය වේ.

සාම්ප්‍රදායික ඉන්ෆ්ලුඑන්සා එන්නත් බොහෝ විට බිත්තර හෝ සෛල පදනම් කරගත් නිෂ්පාදන ක්‍රියාවලීන් හරහා නිෂ්පාදනය කිරීමට මාස කිහිපයක් ගත වේ.

කෙසේ වෙතත්, mRNA තාක්ෂණය හරහා නිෂ්පාදන කාලසීමාවන් සැලකිය යුතු ලෙස කෙටි කර ගැනීමට හැකි වන බවත්, වෛරස් ප්‍රභේද හදිසියේ වෙනස් වුවහොත් ඊට ගැළපෙන පරිදි එන්නත් ඉක්මනින් සකස් කර ගැනීමට හැකි වන බවත් විද්‍යාඥයෝ විශ්වාස කරති.

සෘතුමය ඉන්ෆ්ලුඑන්සා රෝගය ලොව පුරා තවමත් බරපතල සෞඛ්‍ය ගැටළුවක් ලෙස පවතී. ලෝක සෞඛ්‍ය සංවිධානයට අනුව, වාර්ෂික ඉන්ෆ්ලුඑන්සා වසංගත හේතුවෙන් ලොව පුරා මිලියන 3 ත් 5 ත් අතර දැඩි ලෙස රෝගී වීම් සහ ශ්වසන ආසාදන හේතුවෙන් සිදුවන මරණ 650,000 ක් දක්වා වාර්තා වන බව පුරෝකථනය කර ඇත.

mRNA (Messenger RNA - පණිවුඩකාරක ආර්.එන්.ඒ.) යනු අපගේ සෛල තුළ ස්වභාවිකව පවතින ජාන අණු වර්ගයකි. එය අපගේ ජානවල (DNA) ඇති තොරතුරු සෛලවල ප්‍රෝටීන් නිෂ්පාදනය කරන ස්ථාන (Ribosomes) වෙත රැගෙන යෑමේ ප්‍රධාන කාර්යය ඉටු කරයි.

මෑතකදී ඉන්ෆ්ලුඑන්සා සහ COVID-19 වැනි එන්නත් සඳහා මෙම තාක්ෂණය බහුල ලෙස භාවිතයට ගැනේ.

එහි ක්‍රියාකාරීත්වය සහ විශේෂතා කිහිපයක් පහතින් දැක්වේ.

ක්‍රියාත්මක වන ආකාරය - mRNA එන්නත් මඟින් මිනිස් සිරුරට වෛරසයේ හානිකර කොටස් සජීවීව ඇතුළත් කරන්නේ නැත. ඒ වෙනුවට, අදාළ වෛරසයේ ආරක්ෂිත මතුපිට ප්‍රෝටීනයක් (Spike protein) නිපදවන ආකාරය දැක්වෙන "විද්‍යුත් තොරතුරු පණිවුඩයක්" (Blueprint) පමණක් සිරුරට ඇතුළත් කරයි. අපගේ සෛල එම තොරතුරු අනුව අදාළ ප්‍රෝටීනය නිපදවන අතර, සිරුරේ ප්‍රතිශක්තිකරණ පද්ධතිය එය හඳුනාගෙන අනාගතයේදී එම වෛරසයෙන් ආරක්ෂා වීමට අවශ්‍ය ප්‍රතිදේහ (Antibodies) නිපදවා ගනී.

වේගවත් නිෂ්පාදනය - සාම්ප්‍රදායික එන්නත් මෙන් නොව, විද්‍යාගාරයක් තුළ කෘතිමව mRNA අණු නිර්මාණය කළ හැකි බැවින්, වෛරස් නිරන්තරයෙන් විකෘති වන විට (Mutate වන විට) ඒවාට ගැළපෙන ලෙස එන්නත් ඉතා ඉක්මනින් යාවත්කාලීන කර නිෂ්පාදනය කිරීමට මෙම තාක්ෂණයෙන් හැකි වේ.

ආරක්ෂාව - mRNA අණුව සිරුර තුළට ඇතුළු වූ පසු ඉතා කෙටි කාලයකදී ස්වභාවිකවම විනාශ වී යන අතර, එය කිසිවිටෙකත් මිනිස් සිරුරේ DNA සමඟ එකතු වීමක් හෝ වෙනස් වීමක් සිදු නොකරයි.