පාපන්දු ලෝක කුසලාන තරගාවලියේ 32 දෙනාගේ වටයේ පැවැති තීරණාත්මක තරග ද්විත්වයකින් ජයග්‍රහණ අත්කර ගැනීමට ප්‍රබල ආර්ජන්ටිනාව සහ ඊජිප්තුව සමත් විය.
මෙම පරාජයන් සමගින් ඔස්ට්‍රේලියාවට සහ කාබෝ වර්ඩ් රාජ්‍යයට මෙවර ලෝක කුසලාන තරගාවලියෙන් ඉවතට විසිවීමට සිදුවිය.
දඬුවම් පහරින් ඔස්ට්‍රේලියාව පරදා ඊජිප්තුව පෙරමුණට
අමෙරිකාවේ ඩලස් ක්‍රීඩාංගණයේදී පැවැති ඊජිප්තු - ඔස්ට්‍රේලියා තරගයේ නියමිත කාලය අවසන් වන විට කණ්ඩායම් දෙකම ගෝල 1-1ක් ලෙස සම තත්ත්වයේ පසුවිය.
තරගයේ 13 වැනි මිනිත්තුවේදී පළමු ගෝලය වාර්තා කරමින් ඊජිප්තුව පෙරමුණ ගත්තේය.
කෙසේ වෙතත්, දෙවැනි අර්ධයේ 55 වැනි මිනිත්තුවේදී ඊජිප්තු ආරක්ෂක ක්‍රීඩකයින් අතින් සිදු වූ අත්වැරදීමකින් (Own Goal) ඔස්ට්‍රේලියාවට ලකුණු සම කර ගැනීමට අවස්ථාව හිමිවිය.
ජයග්‍රාහකයින් තේරීම සඳහා ලබාදුන් දඬුවම් පහර අවස්ථාවේදී 4-2ක් ලෙස සාර්ථක අත්කරගත් ඊජිප්තුව අවසන් 16 දෙනාගේ වටයට සුදුසුකම් ලැබීය.
ඔවුන් අවසන් 16 වටයේ සහභාගී තරගය ජූලි 7 වැනිදා ප්‍රබල ආර්ජන්ටිනාවට එරෙහිව පැවැත්වීමට නියමිතය.
කාබෝ වර්ඩ් පරදා ආර්ජන්ටිනාවට තියුණු ජයක්
අමෙරිකාවේදී පැවැති තවත් තරගයකින් කාබෝ වර්ඩ් කණ්ඩායම ගෝල 3-2ක් ලෙස පරාජය කරමින් තියුණු ජයක් ලැබීමට ආර්ජන්ටිනාව සමත් විය.
තරගයේ නියමිත කාලය අවසන් වන විට කණ්ඩායම් දෙකම ගෝල 1-1ක් ලෙස සම තත්ත්වයෙන් පසු වූ බැවින්, ජයග්‍රාහකයා තේරීම සඳහා අතිරේක කාලයක් ලබා දීමට විනිසුරුවරුන් පියවර ගත්හ.
එම කාලය තුළදී ප්‍රතිවාදීන් අතින් සිදු වූ ගෝලයේ (Own Goal) වාසියද සමගින් තවත් ගෝල 2ක් වාර්තා කිරීමට ආර්ජන්ටිනාව සමත් විය.
එහිදී කාබෝ වර්ඩ් කණ්ඩායමට ලබාගත හැකි වූයේ එක් ගෝලයක් පමණි. ඒ අනුව ආර්ජන්ටිනාව අවසන් 16 දෙනාගේ වටයේ තම ස්ථානය තහවුරු කරගත්තේය.
