ආණමඩුව කොට්ටුකච්චිය ආසන්නයේ යතුරුපැදියක් මාර්ගයෙන් ඉවතට පැන අනතුරක් සිදුව තිබේ.
අනතුරින් එකම පවුලේ බාල සොහොයුරා මරණයට පත්ව ඇති අතර බරපතළ තුවාල ලැබූ වැඩිමල් සොහොයුරා කොළඹ ජාතික රෝහලට අද (02) අලුයම ඇතුළත් කර ඇති බව ආණමඩුව පොලීසිය පවසයි.
පොසොන් පොහොය නිමිත්තෙන් ආණමඩුව නගරයේ පැවති පොසොන් කලාපය නැරඹීමට ගොස් ආපසු නිවෙස බලා එමින් සිටියදී මොවුන් මෙම අනතුරට මුහුණ දී තිබුණි.
යතුරුපැදියේ අධික වේගයත් සමඟ පාලනයෙන් ගිලිහී ගොස් කොට්ටුකච්චිය හා කච්චිමඩුව ජලාශ දෙක යා කරන පාලමට නුදුරින් ඇළ මාර්ගයකට ඇද වැටී මෙම අනතුර සිදුව තිබුණි.
පොලීසිය පවසන්නේ, අනතුර සිදුවන අවස්ථාවේදී යතුරුපැදිය පදවා ඇත්තේ 19 හැවිරිදි සසිඳු ලක්ෂාන් නැමති තරුණයා බවත් ඔහුගේ වැඩිමහල් සොහොයුරා වන පසිඳු ලක්ෂාන් යතුරුපැදියේ පසුපස ගමන් කර ඇති බවත්ය.
සසිඳු මියගොස් ඇත්තේ රිය අනතුරින් නොවන අතර, ඔහු අනපේක්ෂිතව මුහුණදුන් වෙනත් අනතුරක් මරණයට හේතුව වී ඇති බව පසුව අනාවරණය වුණි.
අනතුරින් පසුව සසිඳු මහත් වෙහෙසක් දරා අනතුර සිදුවු ස්ථානයෙන් නැඟිට අඩි කිහිපයක් ඇවිද ගොස් ඇති අතර, ඔහු කළුවරේ ඇවිද ගොස් ඇත්තේ, කච්චිමඩුව ජලාශයට ජලය ගලායන ගැඹුරු ඇළ මාර්ගය දෙසටය.
එහිදී එක්වරම ඔහු ඇළ මාර්ගයට ඇද වැටී ඇති අතර, පසුව ඔහුගේ සිරුර ජලයේ තිබී සොයාගෙන තිබුණි.
සසිඳුව කඩිනමින් පුත්තලම රෝහලට ඇතුළත් කළ ද ඔහු ඒ වනවිටත් මියගොස් සිටි බව වාර්තා වේ.
මේ අතර වැඩිමල් සහෝදරයා පුත්තලම මූලික රෝහලට ඇතුළත් කර බරපතළ ශරීර අභ්‍යන්තර හානි හේතුවෙන් ඔහු කොළඹ ජාතික රෝහල වෙත මාරුකර යවා තිබේ.
අනතුර සම්බන්ධයෙන් ආණමඩුව පොලීසිය වැඩිදුර පරීක්ෂණ පවත්වනු ලබයි.
