අතිඋතුම් මැල්කම් කාදිනල් රංජිත් හිමිපාණන්, ශුද්ධෝත්තම XIV ලියෝ පාප් වහන්සේ විසින් ජුනි 26 සහ 27 යන දෙදින තුළ වතිකානයේදී කැඳවන ලද දෙවන විශේෂ කාදිනල් සභාවට සහභාගී වී තිබේ.
පාප් වහන්සේ විසින් කැඳවනු ලබන මෙම විශේෂ කාදිනල් සභාව, කතෝලික සභාව සහ ලෝකයට අදාළ වැදගත් කරුණු පිළිබඳව කාදිනල් මණ්ඩලයේ අදහස් හා උපදෙස් ලබාගැනීමේ උපදේශන හමුවක් ලෙස පැවැත්විණි.
ශාන්ත පේදුරු බැසිලිකාවේදී පැවති පාප් වහන්සේගේ ප්‍රධානත්වයෙන් යුත් දිව්‍ය පූජාවකින් ආරම්භ වූ මෙම සභාවේදී, VI වන පාවුළු ශ්‍රවණාගාරයේ පැවති සැසි හතරක් තුළ ලෝකයේ සහ සභාවේ වත්මන් තත්ත්වය, සාමය ප්‍රවර්ධනය කිරීම, සංගමන ක්‍රියාවලිය සහ “Magnifica Humanitas” නම් පාප්තුමාගේ නව ආගමික ලේඛනය සම්බන්ධයෙන් සාකච්ඡා පැවැත්විණි.
මෙම හමුවේදී මැල්කම් කාදිනල් රංජිත් හිමිපාණන් සිය දීර්ඝ දේවගැති සේවා අත්දැකීම් ඇසුරින් අදාළ කරුණු පිළිබඳව සිය අදහස් ශුද්ධෝත්තම පියතුමා සහ අනෙකුත් කාදිනල්වරුන් සමඟ බෙදාහදා ගත්හ.
ලොව පුරා රටවල් නියෝජනය කරමින් කාදිනල්වරුන් 178 දෙනෙකු මෙම විශේෂ සභාවට සහභාගී වූ අතර, එහි සමාප්ති උත්සවය ලෙස ශාන්ත පේදුරු සහ ශාන්ත පාවුළු අපෝස්තුළුවරුන්ගේ මංගල්‍යය නිමිත්තෙන් ජුනි 29 වන දින පාප් වහන්සේගේ ප්‍රධානත්වයෙන් විශේෂ දිව්‍ය පූජාවක් පැවැත්විණි.
