විශේෂ සෝදිසි මෙහෙයුම් යටතේ පුද්ගලයින් 28,147ක් පරීක්ෂාවට

අපරාධ හා මත්ද්‍රව්‍ය නිවාරණ මෙහෙයුම් මගින් දිවයින පුරා අපරාධවලට සම්බන්ධ සැකකරුවන් අත්අඩංගුවට ගැනීම සඳහා පොලීසිය විසින් ආරම්භ කර ඇති දෛනික සෝදිසි මෙහෙයුම් මගින් සැකකරුවන් 589ක් අත්අඩංගුවට ගත් බව පොලීසිය පවසයි.

ඒ අනුව ඊයේ (05) දිනයේදී පුද්ගලයින් 28,147ක් පරීක්ෂාවට ලක් කර ඇති අතර එහිදී මෙම සැකකරුවන්  පොලීසිය විසින් අත්අඩංගුවට ගෙන තිබේ.

පොලීසිය පැවසුවේ මෙම සැකකරුවන්ගෙන් අපරාධ සම්බන්ධයෙන් සෘජුව පුද්ගලයින් 22ක් හඳුනාගත් අතර විවෘත වරෙන්තුකරුවන් 149ක්ද අත්අඩංගුවට ගත් බවය.

එමෙන්ම මෙම සෝදිසි මෙහෙයුමේදී බීමත්ව රිය පැදවීමේ චෝදනා මත පුද්ගලයින් 57ක් සහ අපරික්ෂාකාරීව රිය පැදවීමේ චෝදනා මත පුද්ගලයින් 78ද පොලීසිය විසින් මෙහිදී අත්අඩංගුවට ගෙන තිබේ.

තවද වෙනත් රථවාහන වැරදි සම්බන්ධයෙන් පුද්ගලයින් 4,289කට නීතිමය ක්‍රියාමාර්ග ගෙන ඇති බවත් පොලීසිය සඳහන් කළේය.