අලුත් අවුරුද්දට විශේෂ ප්රවාහන සැළැස්මක්
April 7, 2026 04:46 pm
සිංහල සහ හින්දු අලුත් අවුරුද්ද වෙනුවනේ ගම් බිම් බලා පිටත්ව යන ජනතාව වෙනුවෙන් විශේෂ ප්රවාහන සැළැස්මක් ක්රියාත්මක කිරීමට ජාතික ගමනාගමන කොමිෂන් සභාව පියවර ගෙන තිබේ.
ඒ අනුව හෙට සිට අප්රේල් මස 20 දක්වා කාලසීමාව තුළ දුම්රිය දෙපාර්තමේන්තුව සහ ශ්රී ලංකා ගමනාගමන මණ්ඩලය ඒකාබද්ධව මෙම විශේෂ ප්රවාහන සැළැස්ම ක්රියාත්මක වනු ඇති බව සඳහන් වෙයි.
ඊට අදාළව ජාතික ගමනාගමන කොමිෂන් සභාව මගින් නියාමනය වන අන්තර් පළාත් පෞද්ගලික බස් සේවාවන් මගින් දෛනිකව අතිරේක ගමන්වාර 800 බැගින් යොදවා ඇති බව ජාතික ගමනාගමන කොමිෂන් සභාව පවසයි.
මීට සමගාමීව ශ්රී ලංකා දුම්රිය දෙපාර්තමේන්තුව මගින් දැනට ධාවනය වන ගමනාන්ත සඳහා කොටුව දුම්රිය ස්ථානයේ සිට සාමාන්ය ගමන්වාරවලට අමතරව අතිරේක විශේෂ දුම්රිය යොදවා ඇති බව ද සඳහන් වෙයි.
මෙම කාලසීමාව තුළ ගම් බිම් බලා පිටත්වයාම සඳහා කොළඹ නගරය සහ තදාසන්න නගර ආශ්රිත බස් සහ දුම්රිය නැවතුම්පළවලට ලක්ෂ 15කට ආසන්න මගීන් සංඛ්යාවක් පැමිණෙනු ඇති බවට අපේක්ෂා කරන බව ජාතික ගමනාගමන කොමිෂන් සභාව පවසයි.
මගීන්ට අවශ්ය සනීපාරක්ෂක පහසුකම්, ආරක්ෂක කටයුතු, ප්රථමාධාර ඇතුළු මූලික අවශ්යතා අදාළ බස් පර්යන්තවල සපයා ඇති අතර විශේෂ රාජකාරී සඳහා නිලධාරීන් ද යොදවා ඇත.
මේ අතර , එම කාලසීමාව තුළ මගීන්ගෙන් අනුමත ගාණට අමතරව වැඩිපුර ගාණක් අය කිරීම, සේවාවේ ගුණාත්මකභාවය ,මගීන්ගේ ආරක්ෂාව වැනි කරුණු පරීක්ෂා කිරීම සඳහා ප්රධාන පිවිසුම් ආවරණය වන පරිදි පැය 24 තුළ ක්රියාත්මකවන ජංගම පරීක්ෂණ නිලධාරීන් සේවයේ යොදවා ඇති බවද ජාතික ගමනාගමන කොමිෂන් සභාව වැඩිදුර පවසයි.
එමෙන්ම අදාළ කාල සීමාව තුළ දවසේ පැය 24ම ආවරණය වන පරිදි මෙහෙයුම් මැදිරියක් සහ පාරිභෝගික සේවා ඒකකයක් ස්ථාපිත කර ඇති බව ද ජාතික ගමනාගමන කොමිෂන් සභාව සඳහන් කර තිබේ.
1955 ක්ෂණික දුරකථන ඇමතුම් අංකය සහ 071 259 55 55 වට්ස්ඇප් අංකය හරහා ඕනෑම අයෙකුට ඒ හා සම්බන්ධ විය හැකි බව ද ජාතික ගමනාගමන කොමිෂන් සභාව වැඩිදුරටත් සඳහන් කරයි.
