හිටපු ජනපති ගෝඨාභයගේ මිරිහානේ නිවස අසල ඇති වූ සිද්ධිය ගැන නීතිපතිගෙන් දැනුම්දීමක්

අරගලය පැවති සමයේ හිටපු ජනාධිපති ගෝඨාභය රාජපක්ෂ මහතාගේ මිරිහානේ පිහිටි නිවස අසල ඇතිවූ කලහාකාරී සිද්ධින් සම්බන්ධයෙන් තවදුරටත් විමර්ශන සිදු කරන බව නීතිපතිවරයා අද (30) ශ්‍රේෂ්ඨාධිකරණයට දැනුම් දී තිබේ. 

එම සිද්ධියෙන් තමන් තුවාල ලැබූ බව සඳහන් කරමින් ධනබාල සිංහම් සුභාකරන් නමැති පුද්ගලයකු ඉදිරිපත් කළ මූලික අයිතිවාසිකම් පෙත්සමක් අද කැඳවූ අවස්ථාවේදී නීතිපතිවරයා වෙනුවෙන් පෙනී සිටි රජයේ නීතිඥවරිය මේ බව දන්වා ඇත. 

අගවිනිසුරු ප්‍රීති පද්මන් සූරසේන, අචල වෙංගප්පුලි සහ අර්ජුන ඔබේසේකර යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ මෙම පෙත්සම කැඳවා තිබුණි. 

එහිදී රජයේ නීතිඥවරිය අධිකරණය හමුවේ කරුණු දක්වමින් මෙම කලාකාරී සිද්ධියට අදාළව සැකකරුවන් 54 දෙනෙකු හඳුනාගෙන ඇති බවත් ඒ අතර මෙම පෙත්සම්කරු එක් සැකකරුවකු වශයෙන් නම්කර තිබෙන බවත් පවසා තිබේ. 

මෙම සිද්ධියට අදාළ විමර්ශන තව දුරටත් සිදුකරන බව කියා සිටි රජයේ නීතිඥවරිය එම විමර්ශනවලට අදාළ ඇතැම් ගොනු පොලීසිය විසින් නීතිපති දෙපාර්තමේන්තුවට ඉදිරිපත් කර තිබෙන බව දන්වා තිබේ. 

කෙසේවෙතත් මෙම විමර්ශනවල ප්‍රගතිය දැනුම් දීම සඳහා දිනයක් ලබාදෙන ලෙසත් ඇය අධිකරණයෙන් ඉල්ලීමක් කර තිබේ.

මෙහිදී පෙත්සම්කාර පාර්ශවය වෙනුවෙන් පෙනී සිටි නීතිඥ හර්මිසා ටීගල් මහත්මිය අධිකරණයට දැනුම් දුන්නේ මෙම පෙත්සම විභාගයට ගැනීම සඳහා ශ්‍රේෂ්ඨාධිකරණය විසින් දැනටමත් අවසර දී තිබෙන බවය. 

කෙසේ වෙතත් මෙම පෙත්සම යළි සැප්තැම්බර් මස 25 වනදා කැඳවන ලෙස නියම කළ ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල එදින අදාළ කටයුතුවල ප්‍රගතිය අධිකරණයට දැනුම් දෙන ලෙසත් රජයේ නීතිඥවරියට නියම කර තිබේ.