පුද්ගලයකුට පහරදුන් සුරාබදු නිලධාරීන් 7කට රු. ලක්ෂ 5ක වන්දි ගෙවීමට නියෝග

මිදිගම ප්‍රදේශයේ අවන්හල් හිමියෙකුට පහරදී හිරිහැරයට ලක්කිරීම තුළින් සුරාබදු නිලධාරීන් හත් දෙනෙකු ඔහුගේ මූලික මිනිස් අයිතිවාසිකම් උල්ලංඝනය කර ඇතැයි ශ්‍රේෂ්ඨාධිකරණය අද (12) තීන්දු කළේය.

ඒ අනුව එක් එක් සුරාබදු නිලධාරියාට රුපියල් 75,000 බැගින් අදාල නිලධාරීන් හත්දෙනා විසින් ඔවුන්ගේ පෞද්ගලික මුදලින් රුපියල් 525,000ක මුදලක් වන්දි වශයෙන් පෙත්සම්කරුට ගෙවිය යුතු බවත් ශ්‍රේෂ්ඨාධිකරණය සිය නියෝගයේ සඳහන් කර ඇත.

අදාළ වන්දි මුදල තීන්දුව ලබාදුන් දින සිට මාස 3ක් ඇතුළත ගෙවා අවසන් කළ යුතු බවද අධිකරණ නියෝගයේ සඳහන්ය.

එම පෙත්සම විභාග කළ ජනක් ද සිල්වා, සම්පත් අබේකෝන් යන මහත්වරුන්ගේ එකඟත්වය ඇතිව ශ්‍රේෂ්ඨාධිකරණ විනිසුරු මේනකා විජේසුන්දර මහත්මිය විසින් මෙම තීන්දුව ලබා දුන්නේය.

පෙත්සම්කරු කියා සිටින්නේ, 2023 වසරේ ජනවාරි මස 4 වනදා තමන්ගේ අවන්හල පිටත කිසියම් කලබලයක් සිදුවන ආකාරය ඇසුණු බවත් ඒ අනුව තමා ආයතනයේ සවිකර තිබූ CCTV කැමරා පරීක්ෂා කළ බවය. 

එහිදී වගඋත්තරකරුවන් කිහිපදෙනෙකු විසින් තම සේවකයින්ට පහරදෙන ආකාරය දුටු බවත් ඔහු සඳහන් කරයි.

පසුව තම ආයතනය තුළට කඩා වැදුණු එම නිලධාරීන් පොලීසිය බව පවසමින්, බැටන් පොලුවලින් තමන්ට පහර දුන් බවත් පසුව ඇඳ ඇතිරිල්ලකින් ඇස් බැද පහරදීම් සිදුකළ බවත් මත්පැන් බෝතල් පිළිබඳව වරින්වර ප්‍රශ්න කළ බවක් ඔහු චෝදනා කළේය.

ඉදිරිපත් වූ කරුණු සලකා බැලූ ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඒකමතිකව තීන්දු කළේ, මෙම ක්‍රියාව තුළින් වගඋත්තරකාර සුරාබදු නිලධාරීන් පෙත්සම්කරුගේ මූලික මිනිස් අයිතිවාසිකම් උල්ලංඝනය කර තිබෙන බවය. 

මෙම අනීතික ක්‍රියාව හරහා වගඋත්තරකරුවන් පෙත්සම්කරුට නීතිය ඉදිරියේ සමාන ආරක්ෂාවක් ලැබීමට තිබෙන මූලික අයිතිය උල්ලංඝනය කර තිබෙන බවත් විනිසුරු මඩුල්ල සිය තීන්දුවේ සඳහන් කළේය.

මෙහිදී පෙත්සම්කාර පාර්ශ්වය වෙනුවෙන් නීතිඥ නිලුකා දිසානායක මහත්මියගේ උපදෙස් මත නීතිඥ හෆීල් ෆාරිස් මහතා පෙනී සිටි අතර, වගඋත්තරකරුවන් වෙනුවෙන් අතිරේක සොලිසිටර් ජෙනරාල් ලක්මාලී කරුණානායක මහත්මිය පෙනී සිටියේය.