අනුරාධපුර වෙඩි තැබීමේ සිද්ධියට තුවාලකරුගේ මිතුරන් 05ක් අත්අඩංගුවට
June 28, 2025 01:51 pm
අනුරාධපුර තිරප්පනේ ගල්කුලම ප්‍රදේශයේ සිදුකළ වෙඩි තැබීමේ සිද්ධිය සම්බන්ධයෙන් පුද්ගලයින් 05 දෙනෙකු අත්අඩංගුවට ගෙන තිබේ.
මෙලෙස අත්අඩංගුවට ගෙන ඇත්තේ වෙඩි වැදීමෙන් තුවාල ලැබූ පුද්ගලයාගේ මිතුරන් කිහිපදෙනෙකු බව පොලීසිය සඳහන් කළේය.
පසුගිය 26 වනදා රාත්‍රී කාලයේ අනුරාධපුර තිරප්පනේ ගල්කුලම ප්‍රදේශයේදී වෙඩි තැබීමක් සිදුව තිබුණි.
එහිදි 28 හැවිරිදි තරුණයෙකු තුවාල ලබා අනුරාධපුර රෝහලට ඇතුළත් කර ඇති අතර ඔහු මේ වනවිට එම රෝහලේ නේවාසිකව ප්‍රතිකාර ලබයි.
වෙඩි තැබීම සම්බන්ධයෙන් අනුරාධපුර කොට්ඨාස අපරාධ අංශය විසින් පරීක්ෂණ ආරම්භ කළ අතර ඊයේ පස්වරුවේ වෙඩි තැබීමට ආධාර අනුබල දීමේ චෝදනාව මත අදාළ සැකකරුවන් අත්අඩංගුවට ගෙන ඇති බව සඳහන්ය.
එම අවස්ථාවේ සැකකරුවන් සන්තකයේ තිබී අයිස් මත්ද්‍රව්‍ය ද සොයා ගත් බව පොලීසිය සඳහන් කළේය.
සිදුකළ මූලික විමර්ශනවලදී අනාවරණය වී ඇත්තේ තුවාල ලැබූ පුද්ගලයා සහ අත්අඩංගුවට ගත් සැකකරුවන් මිතුරන් බවත් ඔවුන් අතර මත්ද්‍රව්‍ය සම්බන්ධයෙන් ඇතිවූ ආරවුලක් හේතුවෙන් මෙම වෙඩි තැබීම සිදුව ඇති බවටය.
කෙසේවෙතත් තුවාල ලැබූ පුද්ගලයා ද මත්ද්‍රව්‍ය ජාවාරම්වලට සම්බන්ධ අයෙකු බවට ද පොලීසිය සිදුකරන විමර්ශනවලදී අනාවරණය වී තිබේ.
අත්අඩංගුවට ගත් සැකකරුවන් අවුරුදු 29ත් 31ත් අතර වයස්වල පසුවන අනුරාධපුර සියඹලාගස්වැව ප්‍රදේශයේ පදිංචිකරුවන් වන අතර අනුරාධපුර කොට්ඨස අපරාධ විමර්ශන අංශය විසින් වැඩිදුර විමර්ශණ සිදුකරනු ලබයි.
