අමෙරිකාවේ බදු ප්‍රතිපත්තියට ඉදිරිපත්කරන අවසාන යෝජනා ලබන අඟහරුවාදා

අමෙරිකානු නිර්දේශ පරිදි දෙරටේ වෙළෙඳ පරතරය අවම කර ගැනීම සඳහා වන යෝජනාවලියක් එළඹෙන අඟහරුවාදා (08) පැවැත්වෙන විශේෂ සාකච්ඡාවකදී එරට බලධාරීන්ට ඉදිරිපත් කිරීමට බලාපොරොත්තුවන බව කම්කරු අමාත්‍ය සහ ආර්ථික සංවර්ධන නියෝජ්‍ය අමාත්‍ය ආචාර්ය අනිල් ජයන්ත මහතා අද (06) අනාවරණ කළේය.

ඒ අමෙරිකානු නව තීරු බදු ප්‍රතිපත්තිය ශ්‍රී ලංකාවට බලපාන ආකාරය සම්බන්ධයෙන් ජනතාව දැනුම්වත් කිරීමට පැවති විශේෂ ප්‍රවෘත්ති සාකච්ඡාවේදීයි.

එහිදී වැඩිදුරටත් අදහස් දැක්වූ කම්කරු අමාත්‍ය සහ ආර්ථික සංවර්ධන නියෝජ්‍ය අමාත්‍ය ආචාර්ය අනිල් ජයන්ත මහතා, 

"44%ක තීරු බදු පනවන්න පටන් ගත්තට පස්සේ ප්‍රධාන වශයෙන් අපනයන භාණ්ඩ ප්‍රධාන කාණ්ඩවලින් 80-86% ක් අදාළ වෙනවා. ඇඟලුම් ක්ෂේත්‍රය, ප්ලාස්ටික් සහ රබර් නිෂ්පාදන, ආහාර සැකසුම් නිෂ්පාදන, ආභරණ සහ තවත් දේ අදාළ වෙනවා. එකතුව 86%ක් බවට පත්වෙනවා.  බදු පැනවීමත් සමග අපේ භාණ්ඩ තරඟකාරී බවින් ඉවත්වෙනවා. අපිට මොකක්ද කරන්න පුළුවන්? වෙළෙඳ පරතරය අඩුකරන්න අමෙරිකාව යෝජනා කළා.  අපි අමෙරිකානු වෙළෙඳ නියෝජතයින් සමග රැස්වීමක් ගත්තා. වෙළෙඳ පරතරය අඩු කරන්න අපේ යෝජනා ඉදිරිපත් කරන්න කිව්වා. අවසාන යෝජනා ලබන අඟහරුවාදා අපි ඉදිරිපත් කරනවා."

ප්‍රශ්නය - වියට්නාමය අමෙරිකාවට බදු 0% දක්වා අඩු කරලා තියෙනවා, අපෙත් එහෙම තීරණයක් තියෙනවාද?

"පොදු අනුපාතය 10%ක් කියලා අමෙරිකාව ඉදිරිපත් කළානේ. ඒ අමෙරිකාව ආනයනය කරද්දි අනුපාතය 20% හෝ අඩුනම්. 20%ක වගේ අනුපාතයක් සාකච්ඡා කරන්න පුළුවන්. පෙර සඳහන් කළ කාණ්ඩ 5ට විශේෂ අවධානයක් දෙනවා."

ප්‍රශ්නය -  ඉන්දිය අග්‍රාමාත්‍යවරයාගේ සංචාරය අතරතුර මේ ප්‍රශ්නයට විසඳුම් ඉන්දියාවෙන් රජය ඉල්ලා සිටියාද?

"අපි ඉල්ලීමක් කළා, සලකා බලනවා කියලා කිව්වා." 

මේ අතර අමෙරිකානු ජනාධිපති ඩොනල්ඩ් ට්‍රම්ප් හඳුන්වාදුන් නව තීරුබදු ප්‍රතිපත්තිය ඇතුළු දැඩි සමාජ ආර්ථික ප්‍රතිපත්තිවලට එරෙහිව හඩ නගමින් HAND OFF නමින් අමෙරිකානු ජනතාව දැවැන්ත විරෝධතා මාලාවක් ආරම්භ කර තිබේ.

අමෙරිකාවේ ප්‍රාන්ත 50 පුරාම ස්ථාන 1,200කට අධික සංඛ්‍යාවක දී පැවති මෙම විරෝධතා මාලාව ට්‍රම්ප් ධුරයට පත් වීමෙන් පසුව ඔහුට එල්ල වූ දැවැන්තම ජනතා විරෝධය වේ.

එමෙන්ම බිලියනපති ඊලෝන් මස්ක් රජයේ කටයුතුවලට අතපෙවීමත් ජනතාවගේ දැඩි විවේචනයට ලක්වී ඇත.

මීට සමගාමීව ජර්මනිය, බ්‍රිතාන්‍ය,ප්‍රංශය, පෘතුගාලය ඇතුළු රටවල් රැසකදී ද ට්‍රම්ප්ගේ තීරුබදු ප්‍රතිපත්තියට එරෙහිව විරෝධතා  පැවැත්විය.