කොළඹ ඇතුළු ශ්රී ලංකාවේ බොහෝ ප්රදේශවල වායු තත්ත්ව දර්ශකය ඉහළගොස් ඇති බව මධ්යම පරිසර අධිකාරියේ මාධ්ය ප්රකාශක ආචාර්ය අජිත් ගුණවර්ධන මහතා පැවසීය.
දිවයිනට බලපෑ අයහපත් කාලගුණික තත්ත්වයත් සමග ඇතිව තිබෙන අඳුරු ආලෝකය පිළිබඳ පැහැදිලි කිරීමක් සිදුකරමින් ඔහු මේ කරුණු අනාවරණය කර සිටියේය.
මෙහිදී ඔහු පෙන්වා දුන්නේ සාමාන්යයෙන් මෙරට වායු තත්ත්ව දර්ශකය 50 අඩු අගයක තිබෙන බවයි.
නමුත් පසුගියදා ඇති වූ අධික වර්ෂාපතනයත් සමග එම දර්ශකය ඉහළ යෑම හේතුවෙන් දිවයිනේ බොහෝ ප්රදේශවල මීදුම් තත්ත්වයකට සමාන දූවිලි තත්ත්වයක් දක්නට ලැබුණු බව පැවසීය.
අහිතකර කාලගුණ තත්ත්වය නිසා උතුරු සහ අන්තර් දේශ සීමාවේ තිබෙන වායු දූෂකකාරක මෙරටට ඇතුළුවීම මෙම තත්ත්වයට හේතුව බව ඔහු පෙන්වා දුන්නේය.
මේ හේතුවෙන් අනුරාධපුර, යාපනය, කොළඹ වැනි ප්රදේශවල වායු තත්ත්ව දර්ශකය 180 වැනි ඉහළ අගයකට ගිය බවද ඔහු පැවසීය.
කෙසේ වෙතත් හෙට (30) දිනය වනවිට මෙම තත්ත්වය පහව යනු ඇති බව ඔහු පෙන්වා දුන්නේය.
වායුගෝලයේ දුවිලි අංශු වැඩිවීම මිනිසාට අහිතකර බවත්, ස්වසන අපහසුතා තියෙන සංවේදී පුද්ලයන් මේ පිළිබඳ වැඩි සැලකිල්ලක් දක්වා වෛද්ය උපදෙස් ලබාගන්නා ලෙසද ඉල්ලා සිටියේය.
මේ පිළිබඳ තවදුරටත් අදහස් දැක් වූ ආචාර්ය අජිත් ගුණවර්ධන මහතා,
" පහුගිය දවස් කිහිපය තුළ දැකගැනීමට ලැබුණා වායුගෝලයේ තිබෙන තත්ත්ව දර්ශකයේ යම්කිසි ඉහළ යෑමක්. උතුරු සහ අන්තර් දේශසීමා අතර තිබුණ ඒ වායු තත්ත්ව ලංකාවට ඇවිල්ලා වායුගෝලයේ තිබෙන වායු තත්ත්ව දර්ශකය ඉහළ අගයක් ගැනීම ඒකට ප්රධාන හේතුව. විශේෂයෙන් අනුරාධපුරය, යාපනය, කොළඹ වගේ ස්ථානවල මේ අගය 180 වගේ අගයක් ගත්තා.
මේකට ප්රධාන හේතුව දින කිහිපයක සිට ලංකාවට බලපා තිබෙන අහිතකර කාගුණික තත්ත්වය. මේ නිසා උතුරු සීමාවේ තිබෙන වායු දූෂකකාරක අපේ රටට ඇතුල්වෙලා තිබනෙවා. මේක ඉතා ඉක්මනට වෙනස් වෙමින් පවතිනවා. අද දවස ඇතුළත පහව යයි කියලා බලාපොරොත්තුවෙනවා.
අපට වායුගෝගය දිහා බැලුවට පස්සේ දුමාරයක් දකින්න ලැබෙනවා. මේකට හේතුව වායුගෝලයට එකතුවෙලා තියෙන අංශු. මේවා අපේ රටේ විතරක් නෙමෙයි අන්තර් දේශසීමා උතුරු ප්රදේශයේ සුළං එක්ක එන අංශු. මේ තත්ත්වය තව ටික දවසක් යනකොට අඩුවෙලා යයි.
ඒ වගේම මේ වගේ දෙයක් ඇතිවෙන්න බලපාන කරුණු රාශියක් තිබෙනවා. අපි ගෙදර පුච්චන පොලිතින් එකේ ඉඳලා වාහනවලින් යන දුමේ හා මහා පරිමාණ කර්මාන්තවලින් පිටවන දුමාරය දක්වා ගොඩක් දේවල් මේවට බලපානවා".
