මඟුල් ගෙදරක ගිය කැබ් රථයක් අනතුරක

දඹුල්ල හබරණ මාර්ගයේ දිගම්පතහ ප්‍රදේශයේ සිදුවූ අනතුරකින් කාන්තාවක් මියගොස් තිබේ.

පොලීසිය පැවසුවේ දඹුල්ල සිට හබරණ දෙසට ධාවන වූ කැබ්රථයක් එම දිසාවටම ධාවනය වූ මෝටර් රථයක් ඉස්සර කිරීමට යාමේ දී ප්‍රතිවිරුද්ධ දෙසින් පැමිණි ලොරිරථයක ගැටීමෙන් මෙම අනතුර සිදුව ඇති බවය.

අනතුරින් තුවාල ලැබූ කැබ්රථයේ ගමන් කළ කාන්තාවක් හබරණ රෝහලට ඇතුළත් කිරීමෙන් අනතුරුව මියගොස් තිබේ.

මියගොස් ඇත්තේ හබරණ හිරිවඩුන්න ප්‍රදේශයේ පදිංචිව සිටි සන්ධ්‍යා කුමාරි නම් 44 හැවිරිදි කාන්තාවකි.

ඇය තවත් පිරිසක් සමග විවාහ මංගල්‍යයකට සහභාගී වී නැවත නිවෙස් බලා එමින් සිටි අවස්ථාවේ මෙම අනතුර සිදුව ඇති අතර එහිදී තවත් දෙදෙනෙකු තුවාල ලබා තිබේ.

අද දෙරණ වාර්තාකරු පැවසුවේ බරපතළ තුවාල ලැබූ දෙදෙනාගෙන් එක් අයෙක් අවුරුදු තුනක පමණ කුඩා ගැහැණු දරුවෙකු බවත් වැඩිදුර ප්‍රතිකාර සඳහා ඇයව මහනුවර රෝහලට මාරුකර යවා ඇති බවත්ය.

සීගිරිය පොලීසිය වැඩිදුර පරීක්ෂණ පවත්වති.