මනුෂ්‍යත්වය මහමඟ දමා ගිය හැටි සීසීටීවී කැමරාවේ

පූගොඩ, දංගල්ල ප්‍රදේශයේ දී ලොරි රථයක ගැටී අනතුරට ලක් වූ 83 හැවිරිදි පුද්ගලයෙකු ප්‍රතිකාර සඳහා රැගෙන යන මුවාවෙන් අතරමඟ දමා ගිය ලොරි රථ රියදුරෙකු අත්අඩංගුවට ගැනීමට පූගොඩ පොලීසිය සමත් ව තිබේ.

ඊයේ (09) අලුයම එකට පමණ 83 හැවිරිදි පුද්ගලයෙකු ලොරි රථයක ගැටී ඇති අතර, ලොරි රථ රියදුරා ඔහු ව ලොරියට නංවාගෙන ඇත්තේ, රෝහල්ගත කිරීමට රැගෙන යන බව පවසමිනි.

එහෙත්, තුවාලකරු අනතුර සිදු වූ ස්ථානයට නුදුරින් බස්සවා ලොරි රියදුරා පළා යන ආකාරය සීසීටීවී කැමරාවක සටහන් ව තිබිණි.

කෙසේ වෙතත් පසු ව ඔහු ජීවිතක්ෂයට පත් වී ඇති බව වාර්තා වේ.

ඒ අනුව පළා ගිය පුද්ගලයා සොයා පූගොඩ පොලීසිය විමර්ශන ආරම්භ කර ඇති අතර, ඒ අනුව පන්නිපිටිය ප්‍රදේශයේ දී ඔහු අත්අඩංගුවට ගෙන ඇත්තේ, ලොරිය ද සමඟිනි.

සැකකරු පූගොඩ මහේස්ත්‍රත්වරයා හමුවට ඉදිරිපත් කිරීමෙන් අනතුරු ව දින 14ක කාලයක් රක්ෂිත බන්ධනාගාරගත කර ඇති බව වාර්තා වේ.