ඩේවිඩ් වෝනර් පිටියෙන් සමුගැනීම ගැන කතා කරයි
June 3, 2023 05:14 pm
ඔස්ට්‍රේලියානු ආරම්භක පිතිකරු ඩේවිඩ් වෝනර් සිය ටෙස්ට් දිවියෙන් සමුගැනීම සම්බන්ධයෙන් නිවේදනය කර තිබේ.
ඒ අනුව, ලබන වසරේ ජනවාරි මාසයේ සිඩ්නිහිදී පාකිස්තාන කණ්ඩායම සමග පැවැත්වෙන ටෙස්ට් තරගය සිය අවසන් ජාත්‍යන්තර ටෙස්ට් තරගය බව වෝනර් ප්‍රකාශ කර ඇත.
එම තරගාවලියට පෙර ලබන 07 වනදා ආරම්භ වන ලෝක කුසලාන ටෙස්ට් ක්‍රිකට් තරගාවලියේ අවසන් මහා තරගයට මෙන්ම එංගලන්ත කණ්ඩායම සමග පැවැත්වෙන අළුබදුන ක්‍රිකට් තරගාවලියට ද ඔහු සහභාගී වීමට නියමිතය.
එමෙන්ම 2024 පන්දුවාර 20යි 20 ලෝක කුසලාන ක්‍රිකට් තරගාවලිය සිය අවසන් ජාත්‍යන්තර 20යි 20 ක්‍රිකට් තරගාවලිය වනු ඇති බවද ඩේවිඩ් වෝනර් සඳහන් කර තිබේ.
2011 වසරේ නවසීලන්ත කණ්ඩායමට එරෙහිව ටෙස්ට් වරම් හිමිකරගත් 36 හැවිරිදි වෝනර් ඔස්ට්‍රේලියානු කණ්ඩායම නියෝජනය කරමින් මේ දක්වා ටෙස්ට් තරග 103කට සහභාගී වෙමින් රැස් කරගෙන ඇති ලකුණු සංඛ්‍යාව 8,158කි.
ටෙස්ට් ශතක 25ක් සහ අර්ධ ශතක 34ක් ලබාගෙන ඇති ඩේවිඩ් වෝනර් ඉනිමකදී රැස්කළ ඉහළම ලකුණු සංඛ්‍යාව 335කි.
