ලොරි - ට්‍රැක්ටර් අනතුරින් දෙදෙනෙක් මරුට
April 15, 2023 08:58 pm
පොළොන්නරුව වළේකඩේ හන්දිය ප්‍රදේශයේදී මාර්ගයේ ගමන් කළ අත්ට්‍රැක්ටරයක් ලොරි රථයක ගැටී සිදුවූ අනතුරකින් කාන්තාවන් දෙදෙනෙකු ජීවිතක්ෂයට පත්ව තිබේ.
අනතුරින් තවත් සිව්දෙනෙකු තුවාල ලබා ඇති අතර අප වාර්තකරු පැවසුවේ මියගිය කාන්තාවන් සහ තුවාල ලැබූ සියලුදෙනා අත්ට්‍රැක්ටරයේ ගමන් කරමින් සිටි පුද්ගලයින් බවය.
අද (15) පස්වරු 4ට පමණ එම අනතුර සිදුව තිබේ.
අනතුර සිදුවන අවස්ථාවේ අත්ට්‍රැක්ටරයේ පුද්ගලයින් 10දෙනෙකු පමණ ගමන් කරමින් සිට ඇති අතර මාර්ගයේ ඉදිරියෙන් පැමිණි ලොරි රථයක් ට්‍රැක්ටරයේ මුහුණට මුහුණ ගැටීමෙන් අනතුර සිදුව තිබුණි.
අනතුරින් කුමුදුනී ශාන්ති සහ නෙළුම් කාන්ති නැමැති 46 හැවිරිදි කාන්තාවන් දෙදෙනෙක් මියගොස් ඇති අතර අත්ට්‍රැක්ටරයේ ගමන් කරමින් සිටි එකම පවුලේ ඥාතීන් සිව්දෙනෙක් තුවාල ලබා පොළොන්නරුව මහ රෝහලට ඇතුළත් කර තිබුණි.
සිද්ධිය සම්බන්ධයෙන් පොළොන්නරුව පොලිසිය වැඩිදුර විමර්ශන සිදුකරයි.
