මහනුවර යටවූයේ අනවසර ඉදිකිරීම් නිසා - මහනුවර නගරාධිපති
December 26, 2022 10:13 pm
අධික වර්ෂාව හේතුවෙන් ආපදාවට ලක්වූ මහනුවර දිස්ත්‍රික්කයේ රජයේ ආයතන සම්බන්ධයෙන් සොයා බැලීම සඳහා මහනුවර ගඟවටකෝරළය සම්බන්ධීකරණ කමිටු සභාපති, රාජ්‍ය අමාත්‍ය දිලුම් අමුණුගම මහතා අද සහභාගී විය.
එසේම පවතින තත්ත්වය ගැන විශේෂ සාකච්ඡාවක් මහනුවර දිස්ත්‍රික් ලේකම් කාර්යාලයේදී පැවැත්වුණි.
එහිදී අදහස් දැක්වූ මහනුවර නගරාධිපති කේසර සේනානායක මහතා පැවසුවේ අනවසර ඉදිකිරීම් හේතුවෙන් ජලය ගලා බැසීමට තිබෙන කාණු පද්ධතිය සහ ඇළ මාර්ග අවහිර වී ඇති බවය.
"හැමවෙලේම මෙවැනි විපත්තියක් වුණාම මහනුවර නගරසභාවට තමා ඇඟිල්ල දික්වෙන්නේ. හැබැයි ඇතැම් අය විසින් නගරසභාවේ කිසිදු අවසරයක් නැතුව හදලා තියෙන ගොඩනැගිලි සහ කඩසාප්පු දාගෙන ඉන්න එකෙන් තමයි ජලය ගලා බසින්න තිබෙන ඇළවල් බෝක්කු තිබුණ ප්‍රමාණයට වඩා අඩුවෙලා තියෙන්නේ. මේක තමා ප්‍රධාන හේතුව ජල ගැල්මට. ඒ නිසා මහනුවර නගරසබාව වශයෙන් අනාගතයේ දී මේ අනවසර ඒවා හඳුනාගෙන එවා ඉවත් කරලා ජලය බැස යන්නට තිබුණු කානු පද්ධතිය සහ ඇලවල් පුළුල් කිරීමට තමයි අපි අදහස් කරන්නේ. "
මේ සම්බන්ධයෙන් අදහස් දැක්වූ මහනුවර ගඟවට කෝරළය සම්බන්ධීකරණ කමිටුවේ සභාපති රාජ්‍ය අමාත්‍ය දිලුම් අමුණුගම මහතා පැවසුවේ මහනුවර නගරයේ ජල ගැලීම් මඩපැවැත්වීමට ගත යුතු ක්‍රියාමාර්ග සම්බන්දයෙන් නිවැරදි සැලසුම් සැකසීමට කටයුතු කරන බවය.
"විටින් විට මහනුවර ට වර්ෂාපතනය වැඩි වෙලා තියෙනවා. ඒ නිසා අපි බලාපොරොත්තු වෙනවා LRDC එකත් ගෙනැල්ලා ඉඩම් ගොඩ කිරීමේ දෙපාර්තමේන්තුවේ ඉන්ජිනේරුවරු සහ නගරසභාව ප්‍රාදේශීය ලේකම් කාර්යාල එකාබද්ධව මහනුවර නගරය ආශ්‍රීතව මේ ජල ගැලීම් තත්ත්වය මඩපැවැත්වීම සම්බන්ධයෙන් ගත යුතු ක්‍රියාමාර්ග මොනවාද කියලා සැලසුම් කරන්න."
මේ අතර හදිසි ජල ගැලීමෙන් මධ්‍යම පළාත් අධ්‍යාපන දෙපාර්තමේන්තුවේ තාප්පයක් කැඩී ජල පහර එහි ගොඩනැගිලි තුළට ඇතුල් වී තිබේ.
එම අවස්ථාවේ එහි තිබූ ලිපිගොනු පිටතට රැගෙන යාමට සේවකයින් පියවර ගෙන තිබූණි.
කෙසේවෙතත් ඊයේ (25) ඇතිවූ ජල ගැලීමෙන් මධ්‍යම පළාත් අධ්‍යාපන දෙපාර්තමේන්තුවේ ගබඩා කර තිබූ පෙළපොත්, විභාග ප්‍රශ්නපත්‍ර, පෞද්ගලික ලිපිගොනු සහ පරිගණක 50 කට පමණ හානි වී ඇත.
එම පරිශ්‍රය පිරිසිදු කිරීමට එහි සේවකයින් අද (26) පියවර ගෙන තිබුණි.
