මහනුවර රෝහලට රු.මි. 570ක අතිනවීන වෛද්ය උපකරණ
August 15, 2026 02:36 pm
මහනුවර ජාතික රෝහලට රුපියල් මිලියන 570ක වටිනාකමකින් යුත් අතිනවීන වෛද්ය උපකරණ පද්ධති 3ක් නිල වශයෙන් රෝගී ප්රතිකාර සේවා සඳහා එක්කිරීම අද (15) සිදු කෙරිණි.
සෞඛ්ය හා ජනමාධ්ය අමාත්ය වෛද්ය නලින් ද ජයතිස්ස, සෞඛ්ය නියෝජ්ය අමාත්ය වෛද්ය හංසක විඡේමුණි යන මහත්වරුන්ගේ සහභාගීත්වයෙන් මෙය සිදුවිය.
මෙහිදී අලුතින් පිහිටුවන ලද නවීනතම තාක්ෂණයෙන් යුතු හෘද කැතීටර්කරණ රසායනාගාර ඒකකය (රු.මි. 200), මැමෝග්රැෆි අංශය (රු.මි. 180) හා සීටී පරීක්ෂණ අංශය (රු.මි. 190) මෙලෙස ජනතා අයිතියට පත් කෙරිණි.
ආසියානු සංවර්ධන බැංකුවේ (ADB) මූල්ය ප්රතිපාදන මත ක්රියාත්මක සෞඛ්ය පද්ධති වැඩිදියුණු කිරීමේ ව්යාපෘතිය මේ සඳහා මූල්ය ප්රතිපාදන ලබාදී ඇත.
මහනුවර ජාතික රෝහලේ විකිරණ ප්රතිකාර සේවා සඳහා එක්වූ දෙවන සීටී ස්කෑන් යන්ත්රය මෙය වන අතර, හෘද කැතීටර්කරණ රසායනාගාර ඒකක ද එම රෝහලට ලැබුණු දෙවන හෘද කැතීටර්කරණ රසායනාගාරය වේ.
එමෙන්ම මෙරට තිබෙන ඉහළම නවීන තාක්ෂණය සහිත මැමෝග්රැෆි යන්ත්ර 5න් එකක්ද අද දින මෙම රෝහලේ ස්ථාපිත කරනු ලැබීය.
වැඩිම පොරොත්තු ලේඛණයක් සහිත මහනුවර ජාතික රෝහලේ මේ වනවිට රු. මිලියන 8,000ක සංවර්ධන ව්යාපෘති ක්රියාත්මක බව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා පවසයි.
සෞඛ්ය හා ජනමාධ්ය අමාත්යංශයේ මූල්ය ප්රතිපාදන මත පිළිකා රෝග ඒකකය, හදිසි අනතුරු ඒකකය ඇතුළු ගොඩනැගිලි ඉදිකිරීම වෙනුවෙන් එම ව්යාපෘති සිදු කරන බව හෙතෙම වැඩිදුරටත් සඳහන් කළේය.
හෘද කැතීටර්කරණ ඒකක (Cath Labs) 16ක් මෙම වසර තුළ මෙරට රෝහල් පද්ධතිය තුළ ස්ථාපිතකිරීමේ වැඩසටහනක් ක්රියාත්මක බවත්, ඒ යටතේ මහනුවර ජාතික රෝහලේ නව හෘද කැතීටර්කරණ රසායනාගාර ඒකකය ස්ථාපිත කෙරුණු බවත් ද අමාත්යවරයා පැවසීය.
