නාවික ගමනාගමන බාධා මැද ඉන්දියාව අත් කරගත් වර්ධනය 

රතු මුහුද සහ හෝමුස් සමුද්‍ර සන්ධිය ආශ්‍රිතව පවතින නොසන්සුන්කාරී තත්ත්වය හමුවේ වුවද, ඉකුත් ජූනි මාසයේදී ඉන්දියාවේ ඉංජිනේරු භාණ්ඩ අපනයනය 21% ක සැලකිය යුතු වර්ධනයක් අත්කරගෙන ඇති බව ඉන්දීය මාධ්‍ය වාර්තා කරයි.

ඒ අනුව සමස්ත අපනයන වටිනාකම අමෙරිකානු ඩොලර් බිලියන 11.48ක් දක්වා ඉහළ ගිය බව ඉන්දීය ඉංජිනේරු අපනයන ප්‍රවර්ධන මණ්ඩලය සඳහන් කරයි.

අමෙරිකා එක්සත් ජනපදය ඉන්දීය ඉංජිනේරු නිෂ්පාදනවල විශාලතම මිලදී ගන්නා ලෙස තවදුරටත් පෙරමුණේ පසුවන අතර, ජූනි මාසයේදී පමණක් සිදුකළ අපනයනයන්හි වටිනාකම ඩොලර් බිලියන 1.95 කි.

චීනය වෙත සිදුකළ අපනයනය 74% කින් ඉහළ ගොස් ඩොලර් මිලියන 361.47 ක් ලෙස සටහන් වී ඇත.

පසුගිය මාර්තු මාසයෙන් අවසන් වූ මුල්‍ය වර්ෂයේදී ඉන්දියාවෙන් චීනයට සිදුකළ සමස්ත අපනයනද 37% කින් ඉහළ ගොස් ඩොලර් බිලියන 20 ආසන්නයට පැමිණ ඇති බව පැවසෙයි.

ඕමානය වෙත සිදුකළ අපනයන සිව්ගුණයකටත් වඩා වැඩි ප්‍රමාණයකින් වර්ධනය වී ඩොලර් මිලියන 259 සීමාවට පැමිණ ඇත.

2026/27 මුල්‍ය වර්ෂයේ  අප්‍රේල් - ජූනි තුළ ඉන්දියාවේ සමස්ත භාණ්ඩ අපනයනයෙන් 25% කට වඩා වැඩි ප්‍රමාණයක් නියෝජනය කරන ඉංජිනේරු ක්ෂේත්‍රය, 18.09% ක වර්ධනයක් පෙන්වා ඇත. ඒ අනුව පෙර වසරේ පැවැති ඩොලර් බිලියන 28.91 ක අගය මෙවර ඩොලර් බිලියන 34.14 ක් දක්වා වර්ධනය වී තිබේ.

නාවික මාර්ගයන්හි ඇතිවූ බාධා නිසා ප්‍රවාහන, රක්ෂණ සහ සංක්‍රමණික වියදම් අධික ලෙස ඉහළ යාමෙන් ඉන්දීය අපනයනකරුවන් මුහුණදී සිටින අර්බුදකාරී වාතාවරණය හමුවේ, ඉංජිනේරු අපනයන අංශය මෙම ප්‍රගතිය ලබා ඇත.