ඩෙංගු රෝගීන් සංඛ්‍යාව 79,000 ඉක්මවයි

2026 වසරේ මේ දක්වා කාලය තුළ දිවයින් පුරා ඩෙංගු රෝගීන් 79,016 දෙනෙකු වාර්තා වී ඇති බව ජාතික ඩෙංගු මර්දන ඒකකයේ නවතම දත්ත පෙන්වා දෙයි.

මෙම කාලය තුළ සිදුව ඇති ඩෙංගු මරණ සංඛ්‍යාව 57ක් වන අතර එම අනුපාතය සියයට 0.07%ක් ලෙස සටහන් වේ.

සෞඛ්‍ය අංශවල දත්තවලට අනුව, ජූනි (21,534) සහ ජූලි (23,641) මාසවලදී ඩෙංගු රෝගීන්ගේ වාර්තා වීම ශීඝ්‍ර ලෙස ඉහළ ගොස් ඇත.

ඒ අනුව 2026 වසරේ 29 වන සතිය වන විට අධි අවදානම් සහිත සෞඛ්‍ය වෛද්‍ය නිලධාරී (MOH) බලප්‍රදේශ සංඛ්‍යාව 175ක් දක්වා ඉහළ ගොස් තිබේ.

එමෙන්ම රෝහල්ගතව ප්‍රතිකාර ලබන රෝගීන් සංඛ්‍යාව 2,391ක් ලෙස සටහන් වේ.

එම වාර්තාවට අනුව ඊයේ (22) මධ්‍යම රාත්‍රිය වන විට මෙරට සමස්ත ඩෙංගු රෝගීන්ගෙන් 52.84%ක් එනම් 41,753 දෙනෙකු වාර්තා වන්නේ බස්නාහිර පළාතෙනි.

ඊට අමතරව දකුණු පළාතෙන් රෝගීන් 12,041ක් එනම් 15.24% ප්‍රතිශතයක් සහ මධ්‍යම පළාතෙන් රෝගීන් 6,699ක් එනම් 8.48%ක ප්‍රතිශතයක් වාර්තා වී තිබේ.

එම දත්ත අනුව මධ්‍යම පළාතේද ඩෙංගු රෝගීන් වාර්තා වීමේ ඉහළ යාමක් දක්නට ලැබේ.

ඊට අමතරව, දිස්ත්‍රික් මට්ටමින් වැඩිම රෝගීන් වාර්තා වූ ආකාරය පහත පරිදි වේ.

ගම්පහ දිස්ත්‍රික්කය - 16,676 (21.10%)

කොළඹ දිස්ත්‍රික්කය- 15,748 (19.93%)

මාතර දිස්ත්‍රික්කය - 5,495 (6.95%)

මහනුවර දිස්ත්‍රික්කය - 5,318 (6.73%)

කළුතර දිස්ත්‍රික්කය - 5,190 (6.57%)

රත්නපුර දිස්ත්‍රික්කය - 4,444 (5.62%)

ගාල්ල දිස්ත්‍රික්කය - 4,391 (5.56%)

පළාත් මට්ටමින් රෝගීන් වාර්තා වීම 

පවතින වර්ෂාපතනයත් සමඟ මදුරුවන් බෝවන ස්ථාන වැඩිවීම මෙම ශීඝ්‍ර ඉහළ යාමට ප්‍රධාන හේතුව වී ඇති අතර, තමන් වටා ඇති පරිශ්‍ර පිරිසිදුව තබා ගන්නා ලෙසත්, උණ තත්ත්වයක් පවතී නම් ප්‍රමාද නොවී සුදුසු වෛද්‍ය ප්‍රතිකාර ලබාගන්නා ලෙසත් සෞඛ්‍ය බලධාරීන් ජනතාවගෙන් නැවත නැවතත් ඉල්ලා සිටී.