විදුලිබල මණ්ඩලයේ ස්වේච්ඡා විශ්රාම ඉල්ලුම් කළ පිරිසට නියමිත වන්දි මුදල ගෙවා නෑ
April 12, 2026 01:04 pm
ලංකා විදුලිබල මණ්ඩලය අහෝසි කිරීමත් සමග ස්වේච්ඡා විශ්රාම ගැනීමේ ක්රමවේදය යටතේ විශ්රාම ඉල්ලුම් කළ පිරිසට මෙතෙක් නියමිත වන්දි මුදල් ගෙවා නොමැති බවට එම විශ්රාම එකමුතුව පවසයි.
එම එකමුතුව පැවසුවේ පසුගිය මාර්තු 09 වැනි දින විදුලිබල මණ්ඩලය අහෝසි කිරීමත් සමග විශ්රාම ඉල්ලුම් කළ පිරිස් සඳහා වන්දි මුදල් ලබා දෙන බවට රජය පැවසුවද මේ වන තෙක් ඊට අදාළ වන්දි මුදල් ගෙවීමට රජය කටයුතු කිරීමට අපොහොසත් වූ බවය.
අදාළ වන්දි මුදල් ගෙවීමට රජය මෙතෙක් අපොහොසත් වීම හේතුවෙන් සිය මූලික මිනිස් අයිතිවාසිකම් උල්ලංඝනය වී ඇති බවට සඳහන් කරමින් මානව හිමිකම් කොමිෂන් සභාව වෙතද දීර්ඝ ලිපියක් යොමු කරමින් අදාළ විශ්රාම එකමුතුව සඳහන් කර ඇත්තේ අදාළ වන්දි මුදල් මෙතෙක් නොලැබීම හේතුවෙන් ඔවුන් මේ වන විට දැඩි ගැටලුකාරි තත්ත්වයකට මුහුණ දී ඇති බවය.
එමෙන්ම මේ සම්බන්ධව බලශක්ති අමාත්ය කුමාර ජයකොඩි මහතා වෙතද ලිපියක් යොමු කිරීමට පියවර ගත් බවද අදාළ සේවක පිරිස සඳහන් කළේය.
විදුලි බල මණ්ඩලය ප්රතිව්යුහගතකරණ ක්රියාවලිය යටතේ එම මණ්ඩලය සමාගම් 6කට බෙදා වෙන් කෙරෙුණු අතර ඊට අනුගත නොවන සේවකයින්ට ස්වේච්ඡා විශ්රාම යෑමට රජය විසින් අවස්ථාව ලබා දුන් අතර ඒ සඳහා උපරිම රුපියල් ලක්ෂ 50ක වන්දි මුදලක් ප්රධානය කරන බවටද සඳහන් කෙරිණි.
ඒ අනුව ලංකා විදුලිබල මණ්ඩලයේ සේවක සේවිකාවන් 2,000කට ආසන්න පිරිසක් මෙම ස්වේච්චා විශ්රාම යෝජනා ක්රමය ඉල්ලුම් කළ අතර ඒ අනුව පසුගිය මාර්තු 09 වැනි දිනෙන් පසුව ඔවුන් ලංකා විදුලිබල මණ්ඩලයෙන් විශ්රාම ගනු ලැබීය.
කෙසේ වෙතත් මීට අදාළ වන්දි මුදල් මෙතෙක් නොලැබීම හේතුවෙන් අදාළ සේවක පිරිස් මේ වන විට දැඩි අර්බුදයකට පත්ව ඇති බවත් එළැඹෙන සිංහල හා හින්දු අලුත් අවුරුදු සමය වන විට සිය පවුල්වල සාමාජිකයින් සමග අවුරුදු සැමරීමට පවා නොහැකිව ආර්ථික ගැටලු රැසකට පත්ව ඇතැයි එම සේවක සේවිකාවන් චෝදනා කර තිබේ.
තවද අදාළ සේවක පිරිස සඳහන් කරනුයේ විශ්රාම ගැන්වීමෙන් පසුව විශ්රාම ගිය සාමාජිකයින්ගේ සේවක අර්ථසාධක අරමුදලේ ශේෂයන්, සේවා නියුක්තිකයින්ගේ භාර අරමුදල් හෝ පාරිතෝෂික දීමනා මෙතෙක් නිදහස් කර ගැනීමටද නොහැකි වී ඇති බවත් වසර ගණනාවක් පුරා විදුලිබල මණ්ඩලය වෙනුවෙන් කැප කළ සේවය වෙනුවෙන් හිමිවිය යුතු නීත්යානුකූල මූල්ය සුරක්ෂිතතාවද මේ වන විට අහිමි කර ඇති බවය.
එමෙන්ම වසර 18ක අඛණ්ඩ සේවයක් සහිතව ස්වේච්ඡා විශ්රාම ලබා ගත් අවුරුදු 55 සම්පූර්ණ වූ පසුව විදුලිබල මණ්ඩලයේ විශ්රාම වැටුප සඳහා සුදුසුකම් ලබන බවට පනත මගින් සඳහන් කර ඇති බැවින් ඒ සඳහා ඔවුන්ට හිමි නීත්යානුකූල විශ්රාම වැටුප ලබා ගැනීමට මේ වන විට නොහැකි වී ඇති බවත් අදාළ සේවක පිරිස සඳහන් කර තිබේ.
එම විශ්රාම එකමුතුව සඳහන් කරනුයේ විශ්රාම ගැන්වීමෙන් පසු අදාළ වන්දි මුදල් රජය විසින් මෙතෙක් නොගෙවීම සම්බන්ධව බලශක්ති නියෝජ්ය අමාත්ය මුහම්මදු ඉල්යාස් මුහම්මදු අර්කම් මහතාද දැනුවත් කළ බවය.
එහිදී නියෝජ්ය අමාත්යවරයා පවසා ඇත්තේ එළැඹෙන සිංහල හින්දු අලුත් අවුරුද්දට පෙර අදාළ වන්දි මුදලින් කොටසක් හෝ ලබා දෙන බව පැවසුවාද මෙතෙක් එම වන්දි මුදල් නොලැබුණු බවත් පසුව අමාත්යවරයා ඇමතීමේදී අදාළ වන්දි මුදල් ගෙවීම සම්බන්ධව ඔහුද පැහැදිලි පිළිතුරක් ලබා නොදුන් බවය.
ඒ අනුව මේ සම්බන්ධව අද දෙරණ නියෝජ්ය අමාත්යවරයාගෙන් ද කරුණු විමසා සිටි අතර එහිදී ඔහු සඳහන් කළේ විශ්රාම එකමුතුව විසින් මේ සම්බන්ධව තමාව දැනුවත් කළ බවය.
එමෙන්ම ඊයේ දිනයේදී එම මුදල් බංකුගත කිරීමට කටයුතු කරන බවට නිලධාරීන් තමාව දැනුවත් කළ බවද ඔහු පැවසීය.
එහෙත් ඒ සම්බන්ධයෙන් වැඩිදුර තොරතුරු තමා නිසි සොයාබැලීමකින් අනතුරුව ප්රකාශ කිරීමට සූදානම් බව නියෝජ්ය අමාත්යවරයා අද දෙරණ සමග සඳහන් කළේය.
මේ අතර තොරතුරු දැනගැනීමට අමාත්යාංශ ලේකම් උදයංග හේමපාල මහතා සම්බන්ධ කර ගැනීමට උත්සාහ දැරුවද එම උත්සාහයන්ද අසාර්ථක විය.
