වැඩි මිලට කීරි සම්බා අලෙවි කළ වෙළෙඳුන් දෙදෙනෙකුට රුපියල් ලක්ෂයක දඩයක්

කීරි සම්බා සහල් පාළන මිල ඉක්මවා අලෙවි කළ පානදුර හා කළුතර ප්‍රදේශවල වෙළෙඳසැල් හිමිකරුවන් දෙදෙනෙකුට අධිකරණය මගින් රුපියල් ලක්ෂය බැගින් දඩ නියම කර තිබේ. 

කීරි සම්බා සහල් කිලෝ ග්‍රෑමයක් රුපියල් 300ක මිලකට අලෙවි කළ පානදුර සරික්කන්මුල්ල ප්‍රදේශයේ වෙළෙඳසැල් හිමියෙකුට සහ  කීරි සම්බා සහල් කිලෝවක් රුපියල් 310ක මිලකට අලෙවි කළ කළුතර නාගොඩ ප්‍ර දේශයේ වෙළදසැල් හිමියෙකුට මෙලෙස දඩ නියම වී ඇති බව පාරිභෝගික කටයුතු පිළිබඳ අධිකාරිය සඳහන් කළේය. 

මීට අමතරව කීරි සම්බා සහල් පාලන මිලට අලෙවිය සිදු නොකර සගවා තබා ගත් හොරණ පෝරුවදණ්ඩ ප්‍රදේශයේ වෙළෙඳසැල් හිමියෙකුට ද හොරණ මහෙස්ත්‍රාත් අධිකරණය රුපියල් 20,000ක දඩයක් නියම කර තිබේ. 

එමෙන්ම එහිදී ඔහු සතුව තිබූ කිලෝ ග්‍රෑම් 5 කීරි සම්බා ඇසුරුම් 25ක් රාජසන්තක කිරීමට ද අධිකරණය නියෝග කර ඇති බව පාරිභෝගික අධිකාරිය සඳහන් කළේය.