සයුරෙන් එතෙර
වැඩතහනමට ලක්ව සිටි තායි අගමැතිනී ෂිනවත්‍රා ධුරයෙන් පහකෙරේ
August 29, 2025 04:16 pm
වැඩතහනමට ලක්ව සිටි හිටපු තායිලන්ත අගමැතිනී පේටොන්ග්ටාන් ෂිනවත්‍රා ධුරයෙන් පහකර තිබේ.
එරට ව්‍යවස්ථාදායක අධිකරණය මෙම තීන්දුව ලබාදුන්නේ අද (29) පැවති නඩු විභාගය අතරතුරදීය.
කාම්බෝජයේ හිටපු නායක හුන් සෙන් සමඟ පැවති දුරකථන සංවාදයකදී ඔහු සමග සුහදව කතා කරමින් රටට අපහාස කළ බවට ඇයට චෝදනා එල්ල වී තිබුණි.
හුන්සෙන් සහ ෂිනවත්‍රා අතර මෙම සංවාදය පැවැත්වීමේ අරමුණ දෙරට අතර ගිලිහෙමින් පවතින සබඳතා තරකර ගැනීම බවත්, එය හුදෙක් සාකච්ඡා කිරීමේ ක්‍රමවේදයක් මිස රටට අපහාස කිරීමක් නොවන බවත් තායිලන්ත හිටපු අගමැතිනිය පවසා තිබේ.
කෙසේ නමුත් හුන් සෙන් හිටපු කාම්බෝජ නායකයා එම දුරකථන සංවාදය විවිධ පාර්ශ්ව වෙත ලබාදීමෙන් අනතුරුව ෂිනවත්‍රා අගමැතිනියට රට තුළින්ම චෝදනා එල්ල වූ අතර, ඇය ධුරයේ වැඩතහනම් කෙරුණේ එහි ප්‍රතිඵලයක් ලෙසය.
ව්‍යවස්ථා අධිකරණය ද අද පෙන්වා දුන්නේ මෙවන් සංවාදයක් පැවැත්වීම මඟින් ඇය තායිලන්ත ජාතියේ අභිමානය පවා දී ඇති බවය.
2008 වසරේ සිට අධිකරණයක් මඟින් ධුරයෙන් පහ කෙරුණු පස්වැනි තායිලන්ත රාජ්‍ය නායකයා වන්නේ පේටොන්ග්ටාන් ෂිනවත්‍රා යි.
