විදෙස් රැකියා ලබා දෙන බවට පවසා මුදල් වංචා කළ සැකකරුවෙකු අත්අඩංගුවට

අසර්බයිජාන් රටෙහි රැකියා ලබාදෙන බවට පවසා ලක්ෂ 12ක මුදලක් වංචා කිරීම සම්බන්ධයෙන් සැකකරුවෙකු අත්අඩංගුවට ගෙන තිබේ.

මෙලෙස අත්අඩංගුවට ගෙන ඇත්තේ වයස අවුරුදු 41ක කදුරුවෙල ප්‍රදේශයේ පදිංචිකරුවෙකු වේ.

හැටන් විශේෂ අපරාධ කාර්යය විමර්ශන අංශයට ලද පැමිණිල්ලක් අනුව මෙම පුද්ගලයා අත්අඩංගුවට ගෙන ඇත.

මෙම සැකකරු විවිධ ප්‍රදේශවල සමාජ සේවා කටයුතු සිදු කරන පුද්ගලයන් හා සම්බන්ධ වී එම පුද්ගලයන් නමින් ගිණුම් ආරම්භ කර එම ගිණුම් වෙත සමාජ ක්‍රියාකාරීන් හරහා මුදල් බැර කරවාගෙන එම මුදල්ද වංචා කර ඇති බවට දැනට සිදු කරන ලද විමර්ශනයේදී අනාවරණය වී තිබේ.

මෙම සැකකරු හැටන් ප්‍රදේශයේ දී පමණක් ලක්ෂ 250ක් පමණ මුදලක් වංචා කර ඇති බවත් දිවයිනේ විවිධ ප්‍රදේශවල මෙවැනි මුදල් වංචා සිදු කර ඇති බවට දැනට සිදු කරන ලද විමර්ශනයේදී අනාවරණය වී ඇති බවත් පොලීසිය පැවසුවේය. 

සැකකරුගේ මෙවැනි මුදල් වංචාවලට හසුව ඇති පුද්ගලයින් වේ නම් 071-6907033 යන දුරකථන අංකයට දැනුම්දෙන ලෙස පොලීසිය වැඩිදුරටත් ඉල්ලා සිටී.