විපක්ෂයේ පක්ෂ එකතු වුණු සාකච්ඡාවේදී අලුත් එකඟතා කිහිපයක්

හිටපු ජනාධිපති රනිල් වික්‍රමසිංහ මහතා අත්අඩංගුවට ගෙන රක්ෂිත බන්ධනාගාරගත කිරීමෙන් අනතුරුව විපක්ෂයේ දේශපාලන පක්ෂ අතර ආරම්භ වූ සාකච්ඡා තවදුරටත් පැවැත්වෙයි.

ඒ අනුව අද (29) උදෑසන විපක්ෂ නායක කාර්යාලයේදී විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් සාකච්ඡාවක් පැවැත්වුණි.

මෙම සාකච්ඡාව සඳහා සමගි ජන බලවේගය, එක්සත් ජාතික පක්ෂය, ශ්‍රී ලංකා නිදහස් පක්ෂය, එක්සත් ජනතා නිදහස් සන්ධානය ඇතුළු දේශපාලන පක්ෂ රැසක් එක්වී තිබුණි.

එහෙත් පසුගිය සාකච්ඡා සඳහා එක්වූ ශ්‍රී ලංකා පොදුජන පෙරමුණ අද දිනයේ පැවති සාකච්ඡා සඳහා එක් නොවීමද විශේෂත්වයකි.
 
අද පැවැති සාකච්ඡාවලදී ප්‍රධාන මාතෘකාව බවට පත්වී තිබුණේ රනිල් වික්‍රමසිංහ මහතාට ඇප ලබාදුන් දිනයේදී උසාවිය ඉදිරිපිට උද්ඝෝෂණ සිදුකළ පාක්ෂිකයන් අත්අඩංගුවට ගැනීමට අධිකරණයෙන් සිදුකළ නියෝගය සම්බන්ධයෙන් බව වාර්තා වෙයි.

එහිදී අධිකරණය ලබාදුන් නියෝගයේ පිටපතක් ලබාගෙන ඒ සම්බන්ධයෙන් ඉදිරියේදී ගතයුතු ක්‍රියාමාර්ග සාකච්ඡා කළ යුතු බව සාකච්ඡාවට එක්වූ නියෝජිතයන්ගේ මතය වී තිබේ.

අවශ්‍ය වුවහොත් නීතිඥ සහාය ලබාදීම සඳහා අවශ්‍ය ක්‍රියාමාර්ග ගන්නා ලෙසද මෙහිදී දේශපාලන නියෝජිතයින් අදාළ පාර්ශ්ව වෙත උපදෙස් ලබාදී ඇත.

එමෙන්ම එක්සත් ජාතික පක්ෂය සහ සමගි ජන බලවේගය අතර ඉදිරියේදී පැවැත්වීමට නියමිත සාකච්ඡා පිළිබඳවත් පොදු විපක්ෂයක් ලෙස ක්‍රියා කළ යුතු ආකාරය සම්බන්ධයෙනුත් මෙම සාකච්ඡාවේදී අවධානය යොමුවී තිබේ.

කෙසේවෙතත් ඉදිරියේදී ජනතාව දැනුවත් කිරීම සඳහා සියලු පක්ෂවල සහභාගීත්වයෙන් කමිටු පත් කිරීමට ද අද පැවැති සාකච්ඡාවේදී එකඟතාවයකට පැමිණ ඇත.

මේ අතර විපක්ෂයේ දේශපාලන කණ්ඩායම්වල තවත් සාකච්ඡාවක් කොළඹ මල් පාරේ පිහිටි එක්සත් ජාතික පක්ෂ නායක, හිටපු ජනාධිපති රනිල් වික්‍රමසිංහ මහතාගේ කාර්යාලයේදී අද දිනයේදී පැවැත්වීමට සැලසුම් කර තිබේ.