රනිල්ව බලන්න රෝහලට ගියාද ? අගමැති හරිනිගෙන් පිළිතුරු

තමන් හිටපු ජනාධිපති රනිල් වික්‍රමසිංහ මහතා බැලීම සඳහා රෝහලට ගිය බවට පළවෙන තොරතුරු සාවද්‍ය බවත් එසේ ගිය බවට තොරතුරු ඇත්තම් එය ඔප්පු කර පෙන්වන ලෙසත් අගමැති හරිනි අමරසූරිය මෙනවිය පවසයි.

මාධ්‍ය සාකච්ඡාවකට එක්වෙමින් ඇය සඳහන් කර සිටියේ එම අසත්‍ය තොරතුරු ප්‍රචාරය කරන ලද මාධ්‍ය ආයතනයට එය ඔප්පු කර පෙන්වන ලෙස තමන් අභියෝග කරන බවය.

එහිදී වැඩිදුරටත් අදහස් දැක්වූ අගමැති හරිනි අමරසූරිය මෙනවිය
''සාවද්‍ය ප්‍රවෘත්ති ප්‍රකාශ කරන අයට මම හිතන්නේ ඉදිරියට අපිට නීති ක්‍රියා මාර්ග ගන්න වෙනවා. මේ විදියට බොරු බොරු ප්‍රවෘත්ති නිර්මාණය කරන්න. මම කියන්නේ මෙච්චරයි. මම ගියා නම් මොකක් හරි ඒ ප්‍රවෘත්ති පාදක වෙන මොනවා හරි සාක්ෂියක් තියෙන්න එපැයි. සාක්ෂි ඉදිරිපත් කරන්න. හරි. එහෙම නිකන් ප්‍රවෘත්ති අහසින් නිර්මාණය කරන්න බැහැනේ. ගියා නම් කොහෙන්ද ඒ තොරතුරු ආවේ? මාව දැක්කද? මොකද අගමැති හැටියට මට ඕන ඕන තැන්වලට ඕන ඕන විදියට යන්න බැහැ. ඉතින් ඒ නිසා මට හොර රහසේ යන්න බෑනේ කොහේටවත්. ඉතින් ඒ නිසා මම ගියා කියලා ඔප්පු කරන්න. මම අභියෝග කරනවා මම ගිය බව ඔබතුමන්ලා ඔප්පු කරන්න. එතකොට හරි මේ ප්‍රශ්නේ විසඳෙනවා. එතකොට මම වැරදියි. මම බොරු කියන්නේ. මම බොරු කියනවා කියලා ඔබතුමාලා ඔප්පු කරන්න එතකොට හරි. එතකොට විසඳෙයි.''