ඔබට බලය දෙන්න තමා අපි පුටුවේ අසුන් ගත්තේ - ජනපතිගෙන් තරුණයින්ට ආරාධනාවක්

වගකීම් සහගත තරුණ නායකත්වයක් බිහිකළ යුතු බවත් කිසිසේත්ම පවුල් පරම්පරාවන්, ඥාතීන් බලය ආරක්ෂා කරගන්නා තරුණ නායකයින් බිහිවිය යුතු නැතැයි ද ජනාධිපතිවරයා පවසයි.

දේශපාලන අතකොළුවක් බවට පත්නොවී රටේ අනාගතය භාරගැනීමට සිටින නියමවරුන් බවට පත්කිරීම තරුණ සමුළුව මේ දක්වා පැමිණි ගමන්මගේ සනිටුහන්ව ඇතැයි ද ජාතික තරුණ සමුළුවේ සමාරම්භක අවස්ථාවට එක්වෙමින් ජනාධිපතිවරයා කියා සිටියේය.

"ඉතින් කලබලවීම පුදුමයක් නොවේ. සැබවින්ම අප අද මේ ඉටුකරනු ලබන්නේ තරුණයාට හිමිතැන සහ ඇයට හෝ ඔහුට අනාගතය කවරාකාරයෙන් නිර්මාණය විය යුතුද ? කවර වගකීම් දැරිය යුතුද යන වගකීම් සහගත තරුණ නායකත්වයන් බිහිකළ යුතුයි. කිසිසේත්ම පවුල් පරම්පරාවන්, ඥාතීන් දිගු කාලයක් බලය ආරක්ෂා කරගැනීම සඳහා වු කාර්යක කොටස්කරුවන් ලෙස නොවේ."

රට භාරගැනීම සඳහා සුදානම් විය යුතු වන්නේ තම පාලනයෙන් පසුව රට භාරගැනීමට අවංකභාවය, හැකියාව සහ නිපුණතාවය ඇති තරුණයින් පිරිසක් බව ද ජනාධිපතිවරයා මෙහිදී අවධාරණය කළේය.

"අද අපි ජනාධිපතිධුර හොබනවා. අමාත්‍ය ධුර හොබවනවා. පාර්ලිමේන්තුව නියෝජනය කරනවා. හැබැයි අපි පුටුවේ වාඩිවෙද්දිම අපට අදහසක් තියෙනවා ඒකෙන් බැහැලා යන දිනයක් ගැන හිතේ තියාගෙන තමා පුටුවේ වාඩිවෙන්නේ. අපි පුටුවේ චිරාත් කාලයක් වැජඹීමේ අරමුණක් අපිට නෑ. අපි ඉතාම පැහැදිලි සද් වුවමනාවක් තියෙනවා. මේ රට ඉතාම විනාශකාරී කණ්ඩායමක් අතේ තිබුණා. ඒ කණ්ඩායම අතින් දේශපාලන බලය අපේ අතට හුවමාරු කරගෙන තියෙනවා. ඒ බලය නුදුරු කාලයේදී ඔබට භාරදීමේ අපේක්ෂාවෙන් තමා අපි මේ පුටුවේ අසුන්ගෙන තියෙන්නේ. අපි කිසිසේත්ම මේ පුටුවේ මල්ටිබෝන්ඩ් වගේ ඇලවිලා ඉන්නේ නෑ. අපි සුදානම් කළ යුත්තේ රට භාරගැනීමට හැකියාව, නිපුණතාවය, අවංකභාවය, හෘදසාක්ෂිය තියෙන නව තරුණ පරම්පරාවක් නිර්මාණය කළ යුතුයි. අපෙන් පසුව මේ රට භාරගැනීමට අවශ්‍ය පරම්පරාව අපි හැදිය යුතුයි."

නව දැනුම සොයා යා හැකි දැනුමේ ඇති වෙන නව පිම්මට වේගයෙන් අනුගත වන නව තරුණ පරපුරක් නිර්මාණය කළ යුතුව ඇති අතර, ඔවුන්ට රටේ අනාගතය භාරදිය යුතුයි යන තිර අධිෂ්ඨානය පවතින බව ද ජනාධිපතිවරයා මෙහිදී වැඩිදුරටත් පැවසීය.

පොදු සමාජය පිළිබඳ සහකම්පනයක් ඇති තරුණයන් මේ මොහොතේ අවශ්‍ය බව ද පැවසු ජනාධිපතිවරයා, රට ඉදිරියට ගෙන යෑම සඳහා මෙය අනිවාර්යයෙන්ම සිදුකළ යුතුව ඇති අතර, ඒ වෙනුවෙන් මෙම තරුණ ව්‍යාපාරයට වැඩි වගකීමක් ඇති බව ද කියා සිටියේය.

යුක්තිගරුක මිනිසෙක් බවට තරුණයින් පත්විය යුතු බවත්, යුක්තිය වෙනුවෙන් හඬ නැගීමට පෙර තරුණයින් යුක්තිගරුක තරුණයෙක් බවට පත්විය යුතු බව ද ජනාධිපතිවරයා පැවසීය.

රාජ්‍ය භාරදීමට සුදුසුකම් ඇති නව තරුණ ව්‍යාපාරයක් ඇති කළ යුතු බවත් ඒ සඳහා සුදුස්සන් වන ලෙසත් ජාතික තරුණ සමුළුව අමතමින් පැමිණ සිටි තරුණයින්ට ජනාධිපතිවරයා ආරාධනා කර සිටියේය.