සයුරෙන් එතෙර
වොෂින්ටන් වෙඩි ප්‍රහාරයෙන් මියගිය යුවළ ගැන හෙළිවෙයි
May 22, 2025 10:30 pm
අමෙරිකාවේ වොෂින්ටන්හි යුදෙව් කෞතුකාගාරය ඉදිරිපිටදී එරට වේලාවෙන් ඊයේ (21) ප.ව. 12.45ට පමණ සිදු වූ වෙඩි ප්‍රහාරයෙන් ඝාතනයට ලක් වූ ඊශ්‍රායල යුවළ ගැන තොරතුරු අනාවරණය කර ඇත.
මෙලෙස මියගොස් ඇත්තේ ඊශ්‍රායල තානාපති කාර්යාලයේ සේවය කළ සේවකයින් දෙදෙනෙකු වන 26 හැවිරිදි සාරා ලින් මිල්ග්‍රිම් සහ 30 හැවිරිදි යාරොන් ලිස්චින්ස්කිය.
ඔවුන් දෙපළ විවාහ ගිවිස ගැනීමට ආසන්නව සිටි යුවළක් බව වොෂින්ටනයේ ඊශ්‍රායල තානාපති යෙචියෙල් ලයිටර් විදෙස් මාධ්‍ය වෙත අනාවරණය කර ඇත.
"ලිස්චින්ස්කි ලබන සතියේ ජෙරුසලමේදී තම පෙම්වතියට විවාහ යෝජනාවක් කිරීමේ අදහසින් ඔහු මේ සතියේ මුද්දක් මිලදී ගෙන තිබුණා" යනුවෙන් පවසා තිබේ.
ලිස්චින්ස්කි 2022 වසරේ සැප්තැම්බර් මාසයේ සිට වොෂින්ටනයේ සේවය කරමින් සිටි අයෙකු වේ.
ඔහු ජර්මනියේ උපත ලැබූවෙකු වන අතර, වයස අවුරුදු 16දී ඊශ්‍රායලයට සංක්‍රමණය වී ඇත.
ජෙරුසලමේ හෙබ්‍රෙව් විශ්වවිද්‍යාලයෙන් ජාත්‍යන්තර සබඳතා පිළිබඳ උපාධියක් සහ රීච්මන් විශ්වවිද්‍යාලයෙන් රාජ්‍ය තාන්ත්‍රිකභාවය සහ උපායමාර්ග පිළිබඳ ශාස්ත්‍රපති උපාධියක් ඇති අයෙකු වේ.
එමෙන්ම සාරාට ද අමෙරිකවේ විශ්වවිද්‍යාලයක ජාත්‍යන්තර සබඳතා පිළිබඳ පශ්චාත් උපාධි දෙකක් සහ එක්සත් ජාතීන්ගේ සංවිධානය විසින් පවත්වාගෙන යනු ලබන සාම විශ්වවිද්‍යාලයෙන් ස්වාභාවික සම්පත් සහ තිරසාර සංවර්ධනය පිළිබඳ පශ්චාත් උපාධි දෙකක් තිබී ඇත.
මෙම වෙඩි ප්‍රහාරය සම්බන්ධයෙන් 30 හැවිරිදි එලියාස් රොඩ්‍රිගස් නමැති අයෙකු අත්අඩංගුවට ගත් අතර, ඔහු චිකාගෝ හි පදිංචිකරුවෙකු බව සඳහන්.
ඔහු ප්‍රහාරයෙන් පසු "නිදහස් පලස්තීනය" යනුවෙන් කෑ ගසා ඇති බව වොෂින්ටන් පොලීසිය පවසයි.
කෙසේ නමුත් මෙම ප්‍රහාරයෙන් පසු ලොව පුරා ඊශ්‍රායල තානාපති කාර්යාලවල ආරක්ෂාව වැඩිකිරීමට ඊශ්‍රායල අගමැති බෙන්ජමින් නෙතන්යාහු කටයුතු යොදා ඇත.
