හික්කඩුවේ වෙඩිතැබීමේ CCTV දර්ශන එළියට

හික්කඩුව කුමාරකන්ද ප්‍රදේශයේදී අඹුසැමි යුවළක් ඉලක්ක කර සිදුකළ වෙඩි තැබීමට අදාළ CCTV දර්ශන අද දෙරණට හමුවී තිබේ.

අදාළ වෙඩි තැබීමෙන් සැමියා මියගිය අතර, බිරිඳ තුවාල ලබා රෝහල්ගත කෙරුණි.

පොලීසිය පැවසුවේ කරන්දෙණියේ සුද්දා හා පොඩි ලැසීගේ පාර්ශ්වය මෙම ඝාතනය සිදුකර ඇතැයි සැක කරන බවය.

හික්කඩුව, කුමාරකන්ද ප්‍රදේශයේ පිහිටි වෙළෙඳ සංකීර්ණයක් තුළදී ඊයේ (03) රාත්‍රී 7ට පමණ වෙඩි තැබීමක් සිදුව තිබුණි.

යතුරුපැදියකින් පැමිණි දෙදෙනෙක් වෙළෙඳසැලක් තුළ සිටි අඹුසැමි යුවළක් ඉලක්ක කර වෙඩි තැබීම සිදුකර ඇති බවයි පොලිසිය පැවසුවේය.

එම වෙඩි ප්‍රහාරය සීසීටීවී කැමරාවක සටහන්ව තිබුණි.

වෙඩික්කරු දැක අඹුසැමි යුවළ වෙළඳසැලින් ඉවතට දිවගොස් ඇති අතර ඔවුන් හඹාගොස් වෙඩි තැබීම සිදුකර තිබුණි.

වෙඩි ප්‍රහාරයෙන් තුවාල ලැබූ යුවළ ගාල්ල ජාතික රෝහලට ඇතුලත් කිරීමේදී සැමියා මියගොස් සිටි බව පොලීසිය පැවසුවේය.

රෝහල් ආරංචිමාර්ග සඳහන් කළේ, බිරිඳගේ තත්ත්වයද බරපතළ බවය.

මෙලෙස  ඝාතනයට ලක්ව තිබුණේ කුමාරකන්ද ප්‍රදේශයේම පදිංචි 61 හැවිරිදි පුද්ගලයෙකි.

ඝාතනය සිදුවූ ස්ථානයේ තිබී ටී-56 හා මිලිමීටර 9 වර්ගයේ උණ්ඩ සොයාගත් බව පොලීසිය සඳහන් කළේය.

පොලීසිය පැවසුවේ ඝාතනයට ලක් වූ පුද්ගලයාගේ පුත්‍රයාද 2017 වසරේ බද්දේගම ප්‍රදේශයේදී ස්ටිකර් ප්‍රශ්නයක් මුල්කරගෙන වෙඩිතබා ඝාතනය කර ඇති බවය.

එහි ප්‍රතිඵලයක් ලෙස මෙම ඝාතනය ද සිදුකර ඇති බවත් කරන්දෙණියේ සුද්දා හා පොඩි ලැසීගේ පාර්ශ්වය වෙඩි ප්‍රහාරය මෙහෙයවා ඇතැයි සැක කරන බවත් පොලීසිය වැඩිදුරටත් සඳහන් කළේය.