හිටපු මන්ත්‍රී ශාන්ත අබේසේකරට අයත් නීතිවිරෝධීව එකලස් කළ සුපිරි රථයේ කොටස් සොයාගනී
February 6, 2025 12:50 pm
පුත්තලම දිස්ත්‍රික් හිටපු පාර්ලිමේන්තු මන්ත්‍රී ශාන්ත අබේසේකර මහතා විසින් භාවිත කළ බව කියන නීතිවිරෝධීව එකලස් කරන ලද ප්‍රාඩෝ රථයක් කොටස් කර සඟවා තිබියදී නීතිවිරෝධී වත්කම් විමර්ශන ඒකය මඟින් අද (06) අලුයම සිය භාරයට ගනු ලැබීය.
මේවන විට හිටපු මන්ත්‍රීවරයා ප්‍රදේශයෙන් පළාගොස් ඇති අතර ඒ හේතුවෙන් අදාළ රථය සම්බන්ධයෙන් ප්‍රකාශයක් ලබාගැනීමට විමර්ශන නිලධාරීන්ට නොහැකි වී තිබේ.
පුත්තලම දිස්ත්‍රික් හිටපු පාර්ලිමේන්තු මන්ත්‍රී ශාන්ත අබේසේකර මහතා විසින් නීති විරෝධීව එකලස් කරන ලද ලෑන්ඩ් කෘෘසර් ප්‍රාඩෝ රථයක් භාවිත කරන බවට නීතිවිරෝධී වත්කම් විමර්ශන ඒකකයේ ජාලගත වංචා විමර්ශන ඒකකයට තොරතුරක් ලැබී තිබුණි.
ඒ අනුව අදාළ තොරතුර සම්බන්ධයෙන් දින ගණනාවක් විමර්ශනය කිරීමෙන් පසුව අද අලුයම එම රථය සිය භාරයට ගැනීමට විමර්ශන නිලධාරීන් කණ්ඩායමක් පුත්තලමට ගොස් තිබේ.
එහිදී අදාළ රථය පිළිබඳව සොයා ගැනීමට නොහැකි වී ඇති අතර වැඩිදුරටත් සිදුකළ පරීක්ෂා කිරීමේදී එය කොටස් කර ස්ථාන දෙකක සඟවා තිබියදී සොයාගනු ලැබීය.
එලෙස එය සඟවා තිබුණේ හිටපු මන්ත්‍රීවරයාට අයත් පුත්තලමේ පිහිටි පොල් ඉඩමක සහ ඔහුගේ නිවසට ආසන්න වූ වෙනත් නිවසකය.
ඒ අනුව එම නිවසේ සඟවා තිබී අදාළ චැසිය සහ බඳ කොටස සොයාගත් අතර ඔහුගේ පොල්වත්තේ තිබී එන්ජිම ඇතුළු කොටස් කිහිපයක්ද සොයා ගත්තේය.
විමර්ශන නිලධාරින් සිදුකළ සොයාබැලීමේදී අනාවරණ වී ඇත්තේ, අදාළ රථය මේවන විටත් කෘෂිකර්ම දෙපාර්තමේන්තුව මඟින් භාවිත කරන ප්‍රාඩෝ රථයක එංජින් අංකය හා චැසි අංකය භාවිත කරමින් ලියාපදිංචි කර ඇති බවය.
හිටපු මන්ත්‍රීවරයා භාවිත කළ රථයට අදාළ අංක කොටා ඇති බවද විමර්ශනවලදී අනාවරණ වී තිබේ.
නීතිවිරෝධීව එකලස් කරන ලද වාහන පසුගිය දිනවල පොලීසිය සිය භාරයට ගැනීමත් සමග හිටපු මන්ත්‍රී ශාන්ත අබේසේකර හා ඔහුගේ පුත්‍රයා එක්ව මෙම රථය කොටස් කර සඟවා ඇති බව විමර්ශනවලදී අනාවරණ වී ඇත.
මේ පිළිබඳව හිටපු මන්ත්‍රීවරයාගෙන් ප්‍රකාශයක් ගැනීම සඳහා ඊයේ (05) දිනයේදී විමර්ශන නිලධාරීන් උත්සහා කළද ඔහු ප්‍රදේශයෙන් පළාගොස් සැඟව සිටීම හේතුවෙන් එය ව්‍යාර්ථ වූ බව පොලීසිය සඳහන් කළේය.
