බන්ධනාගාර නිලධාරීන්ගෙන් මිදී පලාගිය සැකකරු බීලා පාරේ යද්දී හසුවෙයි

බන්ධනාගාර නිලධාරීන්ගෙන් මිදී පලාගිය සැකකරුවෙකු බීමතින් යතුරුපැදියකින් ගමන් කරමින් සිටියදී පොලිස් අත්අඩංගුවට ගෙන තිබේ.

සැකකරු සම්බන්ධයෙන් සිදුකළ විමර්ශනවලදී අනාවරණය වී ඇත්තේ, බාලවයස්කාර දැරියකට ලිංගික අතවර කිරීමේ සිද්ධියක් සම්බන්ධයෙන් සැකකරු එලෙස රක්ෂිත බන්ධනාගාරගත කර සිට ඇති බවය.

තඹුත්තේගම පොලිස් වසමේ අනුරාධපුරය පාදෙණිය ප්‍රධාන මාර්ගයේ කෝන්වැව ප්‍රදේශයේදී තඹුත්තේගම පොලිස් ස්ථානයේ නිලධාරීන් විසින් බීමත්ව රිය ධාවනය කිරීම සම්බන්ධයෙන් සැකකරුව යතුරුපැදියක්ද සමග අත්අඩංගුවට ගෙන තිබුණි.

අත්අඩංගුවට ගත් සැකකරු වයස අවුරුදු 38ක් වන අස්වැද්දුම, කුරුණෑගල ප්‍රදේශයේ පදිංචිකරුවෙකි.

සැකකරු සම්බන්ධයෙන් සිදුකළ විමර්ශනයේදී අත්අඩංගුවට ගන්නා ලද යතුරුපැදිය ඊයේ (24) අනුරාධපුර පොලිස් වසමේදී සොරකම් කරන ලද යතුරුපැදියක් බවට අනාවරණය වී ඇත.

තවද මෙම සැකකරු බාලවයස්කාර දැරියකට ලිංගික අතවර කිරීමක් සම්බන්ධයෙන් කුරුණෑගල පොලිස් ස්ථානය මගින් අත්අඩංගුවට ගෙන කුරුණෑගල මහේස්ත්‍රාත් අධිකරණය වෙත ඉදිරිපත් කිරීමෙන් පසු බන්ධනාගාරගත කර සිට ඇති බවත්, එහිදී ඇතිවූ අසනීප තත්ත්වයක් හේතුවෙන් මහනුවර රෝහලට ඇතුලත් කර සිටියදී බන්ධනාගාර නිලධාරීන්ගෙන් මිදී පලාගොස් ඇති බවත්, සැකකරුට ඉහත නඩුව සඳහා වරෙන්තු නිකුත්වී ඇති බවටත් වැඩිදුර විමර්ශනයේදී අනාවරණය වී ඇත.

සිද්ධිය සම්බන්ධයෙන් තඹුත්තේගම පොලිසිය වැඩිදුර විමර්ශන කටයුතු සිදුකරයි.