නවසීලන්තයට ලකුණු 219ක දැවැන්ත ඉලක්කයක්
January 2, 2025 07:57 am
සංචාරක ශ්‍රී ලංකා කණ්ඩායම සහ නවසීලන්ත කණ්ඩායම අතර මේවනවිට නීල්සන්හීදි පැවැත්වෙන අවසන් විස්සයි විස්ස ක්‍රිකට් තරගයේ පළමුව පන්දුවට පහර දුන් ශ්‍රී ලංකාව නියමිත පන්දුවාර 20 අවසානයේ කඩුලු 5ක් දැවි ලකුණු 218ක් රැස්කිරීමට සමත් විය.
ඊයේ රාත්‍රීයේ නීල්සන් ප්‍රදේශයට බලපෑ වර්ෂාව හේතුවෙන් තරගයේ කාසියේ වාසිය උරගා බැලීම විනාඩි 15ක් පමණ ප්‍රමාද විය.
අනතුරුව තරගයේ කාසියේ වාසිය දිනු නවසීලන්ත නායකයා පළමුව පන්දුවට පහර දීමට ශ්‍රී ලංකාවට ආරාධනා කළේය.
ඒ අනුව ශ්‍රී ලංකා කණ්ඩායම වෙනස්කම් දෙකක් සමඟ අද පිටියට පිවිසි අතර ශ්‍රී ලංකා ඉනිම අරඹමින් පිටියට පිවිසයේ පැතුම් නිස්සංක සහ කුසල් මෙන්ඩිස් විසිනි.
ශ්‍රී ලංකා ලකුණු පුවරුව 83ක් ලෙස සටහන්වනවිට මුල් පෙළ පිතිකරුවන් තිදෙනෙක් ක්‍රීඩාගාරයේ අසුන්ගෙන සිටි අතර ශ්‍රී ලංකාව අසීරු අඩියක පසුවිය.
ඒ අවස්ථාවේදී සිව්වන කඩුල්ල වෙනුවෙන් පිටියට එක්වු නායක චරිත් අසලංක සහ කුසල් ජනිත් පෙරේරා සිව්වන කඩුල්ලට ශතකයක සබඳතාවක් ගොඩනගමින් ශ්‍රී ලංකා ලකුණු පුවරුව ගෞරවාන්විත ලකුණු සංඛයාවක් කරා රැගෙන ගියේය.
ඒ අනුව ශ්‍රී ලංකාව නියමිත පන්දුවාර 20 අවසානයේ කඩුලු 5ක් දැවි රැස්කළ ලකුණු සංඛයාව 218කි.
චරිත් අසලංක ලකුණු 46ක්, කුසල් මෙන්ඩිස් ලකුණු 22ක් සහ පැතුම් නිශ්ශංක ලකුණු 14 ලබා ගත්තේය.
නවසීලන්ත පිල වෙනුවෙන් මැට් හෙන්රි, Jacob Duffy, Zakary Foulkes, මිචෙල් සැන්ට්නර් සහ ඩැරල් මිචෙල් කඩුල්ල බැගින් දවාගත්හ.
දෙරට අතර පැවති පළමු සහ දෙවන විස්සයි විස්ස තරගය දෙකම ජයගැනීමට නවසීලන්ත පිල සමත්වූ අතර ඒ අනුව, තරඟාවලියේ ජය නවසීලන්ත පිලට හිමි වේ.
