ආනයන බද්ද අඩු කරන්නැයි සහල් වෙළෙඳුන්ගෙන් ඉල්ලීමක්

සහල් ආනයනය කිරීමේදී කිලෝග්‍රෑම් එකකට රේගුව විසින් අයකරනු ලබන රුපියල් 65ක බදු මුදල යම් ප්‍රමාණයකින් අඩුකර දෙන ලෙස බොහෝ ප්‍රදේශවල වෙළෙඳුන් රජයෙන් ඉල්ලා සිටී.

වෙළෙඳුන් මෙන් පාරිභෝගික සංවිධාන පෙන්වා දෙන්නේ, ආනයනික සහල් බදු අඩු කළහොත් පාලන මිලට සහල් වෙළෙඳපොළේ පවතිනු ඇති බවය.

මාස දෙකක පමණ සිට පවතින සහල් අර්බුදයට පිළියම් ලෙස උපරිම තොග හා සිල්ලර මිල පැනවීම, පාරිභෝගික කටයුතු අධිකාරිය මගින් සහල් මෝල් වැටලීම මෙන්ම විදේශ රටවලින් සහල් ආනයනය කිරීමටත් රජය පසුගිය සමයේ විවිධ පියවර අනුගමනය කළේය.

සහල් ආනයනයට අවසර හිමිවූ දෙසැම්බර් 20 වැනිදා දක්වා සහල් මෙට්‍රික්ටොන් 67,000ක් ආනයනයකර තිබූ බව ශ්‍රී ලංකා රේගුව පැවසීය.

ඉන් මෙට්‍රික්ටොන් 38,500ක් නාඩු සහල් වන අතර සෙසු මෙට්‍රික්ටොන් 28,500ක් කැකුළු සහල් ය. 

මෙම සහල් තොග වෙනුවෙන් ශ්‍රී ලංකා රේගුව රුපියල් බිලියන 4.3ක් ආනයන බදු ලෙස අයකර ඇත්තේ කිලෝග්‍රෑම් එකකට රුපියල් 65 බැගිනි.

ආනයනික සහල් තොග වෙළෙඳපොළට ලැබීම ආරම්භවීමත් සමඟ පැවති සහල් හිඟය යම් ප්‍රමාණයකින් සමනයවී ඇතත්, තවමත් වෙළෙඳපොළේ නිසි ප්‍රමාණයට සහල් නොමැති බව ඇතැම් ප්‍රදේශවලින් වාර්තා වෙයි.

කෙසේවෙතත් තවත් ප්‍රදේශවල වෙළෙඳුන් පවසන්නේ, තමන් සතුව දේශීය සහල් යම් ප්‍රමාණයකින් ඇතත් ආනයනික සහල් නොමැති බවය.