අසල්වැසියාව ඝාතනය කළ මීගොඩ වෙඩික්කරු අල්ලාගත් මෙහෙයුම   

නාගහවත්ත ප්‍රදේශයේදී පසුගිය 14 වනදා සිය බිරිඳ හා වයස අවුරුදු එකහමාරක කුඩා දරුවා ඉදිරිපිටදී පුද්ගලයෙකුව ඝාතනය කිරීමේ සිද්ධියේ වෙඩික්කරු බස්නාහිර දකුණ අපරාධ කොට්ඨාසය මගින් අත්අඩංගුවට ගෙන තිබේ.

යුද හමුදා සේවයෙන් පලා ආ අයෙකු වන 27 හැවිරිදි සැකකරු ඝාතනයට ලක් වූ පුද්ගලයාගේ නිවස සමීපයේ පදිංචිකරුවෙක්  බව පොලිසිය සඳහන් කළේය.

වෙඩිතැබීම සිදුකළ දිනට පසුදින ඔහු ඝාතනයට ලක් වූ පුද්ගලයාගේ නිවසට ගොස් මෘත ශරීරයට අවසන් ගෞරව ද දක්වා ඇති බව පොලීසිය පැවසුවේය.

සැකකරුගෙන් සිදුකළ ප්‍රශ්න කිරීම්වලදී පවසා ඇත්තේ, මීගොඩ පොඩි දනා නැමැත්තා විසින් ලබාදුන් කොන්ත්‍රාත්තුවක් මත මෙම ඝාතනය සිදුකළ බවයි.

මීට කලකට ඉහත පැවති සාදයකදී මීගොඩ පොඩි දනා සහ ඝාතනයට ලක්වූ පුද්ගලයා අතර හටගත් ගැටුමක් ඝාතනයට හේතුවී ඇති බවද අනාවරණ වී තිබේ.

පොඩි දනා නමැත්තා හා පවතින හිතවත්කම මත කිසිදු මුදලක් ලබා නොගෙන මෙම ඝාතනය සිදුකළ බවද සැකකරු පොලිසිය හමුවේ පවසා ඇති බව වාර්තාවෙයි.

ඝාතනය සඳහා යොදාගත් බවට සැකකෙරන ගිනි අවිය ද පොලීසිය විසින් සොයා ගෙන ඇති අතර‍ වැඩිදුර විමර්ශන බස්නාහිර පළාත භාර නියෝජ්‍ය පොලිස්පති ගයංග මාරපන මහතාගේ අධීක්ෂණය යටතේ සිදුකෙරෙයි.