දකුණේ තවත් වෙඩිතැබීමක්

අද (19) උදෑසන මිදිගම පොලිස් වසමේ ගොවියාපාන ප්‍රදේශයේ මාළු වෙළෙඳසැලක සිටි පුද්ගලයෙකුට වෙඩිතබා ඝාතනය කර තිබේ.

යතුරුපැදියකින් පැමිණි නාඳුනන පුද්ගලයින් දෙදෙනෙකු විසින් වෙඩිතැබීම සිදුකර පළා ගොස් ඇති බවට පොලීසියට ලද පැමිණිල්ලක් මත විමර්ශන ආරම්භ කර තිබේ.

වෙඩිතැබීමෙන් මියගොස් ඇත්තේ, 38 හැවිරිදි කැලුම් චතුරංග නැමති මාළු වෙළෙන්ඳෙකි.

මෙම ඝාතනය විදේශගතව සිටින සංවිධානාත්මක අපරාධකරුවෙකුගේ ක්‍රියාවක් බවට දැනට සිදුකරන ලද විමර්ශනවලදී අනාවරණය වී තිබේ.

මාළු ලබාගැනීමට පැමිණි තවත් පුද්ගලයින් දෙදෙනෙකුට වෙඩි වැදි තුවාල ලබා ප්‍රතිකාර සඳහා මාතර මහ⁣රෝහලට ඇතුළත් කර ඇතැයි වාර්තා වේ.

එලෙස වෙඩි වැදී ඇත්තේ, 38 හැවිරිදි සහ 72 හැවිරිදි පුද්ගලයින් දෙදෙනෙකුටය.

වෙඩිතැබීමෙන් මියගොස් ඇත්තේ, 2022 අගෝස්තු 4 වන දින අහංගම පොලිස් වසමේ ගොවියාපාන ප්‍රදේශයේ හෝටලයකදී වෙඩි තබා ඝාතනය කරන ලද විජේසේකර ගමාච්ච්ගේ අමිල සඳරුවන් යන අයගේ සහෝදරයා බව පොලීසිය පවසයි.

මේ සම්බන්ධයෙන් මිදිගම පොලිස් ස්ථානය මඟින් පරික්ෂණ කටයුතු සිදුකරනු ලබයි.

මේ අතර දෙහිවල සරණංකර පාර ප්‍රදේශයේදී ඊයේ (18) රාත්‍රී 10.00ට පමණ සිදුවු වෙඩි තැබීමකින් පුද්ගලයෙකු මියගොස් තිබුණි.

යතුරුපැදියකින් පැමිණි පුද්ගලයින් දෙදෙනෙකු විසින් මෙම වෙඩි තැබීම සිදුකර ඇති බව පොලිස් මාධ්‍ය ප්‍රකාශක නියෝජ්‍ය පොලිස්පති නීතීඥ නිහාල් තල්දූව මහතා සඳහන් කළේය.

මේ අතර තංගල්ල නලගම ප්‍රදේශයේදී ඊයේ සවස වෙඩි වැදීමකින් පුද්ගලයෙකු මියගොස් ඇති බව පොලීසිය පැවසීය.

තංගල්ල දෙමටවලවත්ත ප්‍රදේශයේ ලඳු කැළෑ ප්‍රදේශයක වෙඩි වැදී සිටි අදාළ පුද්ගලයා තංගල්ල රෝහලට ඇතුළත් කිරීමේ දී මියගොස් ඇති බව පොලීසිය පැවසුවේය.