ශ්‍රී ලංකාව ජයග්‍රහණයට ලකුණු 143ක් පසුපසින්
December 8, 2024 09:27 pm
ශ්‍රී ලංකාව හා දකුණු අප්‍රිකාව අතර Gqeberhaහිදී පැවැත්වෙන අවසන් ටෙස්ට් ක්‍රිකට් තරගයේ 4වන දිනයට අද (8) තරගය නතර කරන විට සිය දෙවන ඉනිම ක්‍රීඩාකරමින් සිටි ශ්‍රී ලංකාව කඩුලු 5ක් දැවී ලකුණු 205ක් රැස්කරගෙන සිටියේය.
ඒ අනුව ලකුණු 348ක ඉලක්කයක් හඹා යමින් සිටින ශ්‍රී ලංකාව කඩුලු 5ක් අතැතිව ජයග්‍රහණයට තවත් ලකුණු 143ක් පසුපසින් සිටියි.
කඩුල්ලේ රැඳී සිටින කුසල් මෙන්ඩිස් හා ධනංජය ද සිල්වා ලකුණු 39ක් බැගින් රැස්කරගෙන සිටින අතර, ඔවුන් දෙදෙනා 6වැනි කඩුල්ලට ලකුණු 83ක නොබිඳුණු සබඳතාවක් පවත්වා ඇත.
මෙම තරගයේ පළමුව පන්දුවට පහරදුන් දකුණු අප්‍රිකාව සිය පළමු ඉනිමට සියලු දෙනා දැවී ලකුණු 358ක් රැස්කළ අතර, ඊට පිළිතුරු ලෙස ශ්‍රී ලංකාව සියලු දෙනා දැවී ලකුණු 328ක් රැස් කළේය.
ලකුණු 30ක වාසියක් සමගින් දෙවැනි ඉනිම ඇරඹූ දකුණු අප්‍රිකාවට සියලු දෙනා දැවී රැස්කළ හැකිවූයේ ලකුණු 317ක් පමණි.
ඒ අනුව ශ්‍රී ලංකාවට ලකුණු 348ක ජයග්‍රාහී ඉලක්කයක් හිමිවිය.
මෙම තරගාවලියේ පළමු තරගය ජයගැනීමට දකුණු අප්‍රිකාව සමත් විය.
ඒ අනුව දකුණු අප්‍රිකානු තරග සංචාරය ජයපරාජයෙන් තොරව අවසන් කරගැනීම සඳහා මෙම තරගයේ ජය ශ්‍රී ලංකාවට අත්‍යාවශ්‍ය වේ.
