හකීම්,විමල්,ඩිලාන්, වාසු වැන්නන්ට යළි වතාවක් තමන් සමග විවාදයකට එන ලෙස අභියෝග කරන බව බොදුබල සේනා සංවිධානයේ මහලේකම් පූජ්ය ගලබොඩඅත්තේ ඥානසාර හිමි පවසයි.
තම සංවිධානය පිළිබඳ වැරදි තොරතුරු ජාත්යන්තරයට ලබාදී ඇත්තේ මෙම පුද්ගලයින් බව උන්වහන්සේ අද (16) කියා සිටියේ කිරුළපන සංවිධාන මූලස්ථානයේ පැවති මාධ්ය හමුවකදීය.
මෙම පුද්ගලයින්ට වඩා මර්වින් සිල්වා අමාත්යවරයා ඉතා හොඳ බවත්, ඔහු බෞද්ධ පදනමක් ඇති හොඳ සිංහල බෞද්ධ නායකයෙකු බවත් උන්වහන්සේ කියා සිටියේය.
මියෙන්මාරයේ අශින් විරතු හිමියන් හමුවීම තම සංවිධානය ත්රස්තවාදී සංවිධානයක් ලෙස නම්කිරීමට එක් හේතුවක් බවට එකී උදවිය කියා සිටින බවත්, එසේවීනම් යුද්ධය පැවති වකවානුවේ පවා නෝර්වේ,අමෙරිකාව මෙන්ම බැන්කී මූන් වැන්නන් ප්රභාකරන් හමුවූ බැවින් ඔවුන්ද ත්රස්තවාදයට උඩගෙඩි දුන් උදවිය ලෙස හඳුනාගත යුතුව ඇති බවත් ඥානසාර හිමියන් අවධාරණය කළේය.
මෙම මාධ්ය හමුවට එක්වූ බොදුබල සේනා සංවිධානයේ ප්රධාන විධායක නිලධාරී ඩිලන්ත විතානගේ මහතා අදහස් දක්වමින් කියා සිටියේ බොදු බල සේනා සංවිධානයට ‘ත්රස්තවාදී ලේබලය‘ ඇලවීම බෞද්ධ විරෝධීන්ගේ සිහිනයක් බවයි.
පසුගිය කාලයේ තම සංවිධානයට විරෝධය දැක්වූ අය තම සංවිධානය ජාත්යන්තර ආයතනයක් විසින් ත්රස්තවාදී සංවිධානයක් ලෙස නම්කිරීම පිළිබඳ ස්වයංවින්දනයක් ලැබූ බව ඔහු පෙන්වා දුන්නේය.
තම සංවිධානයේ අනුග්රාහකයා ආරක්ෂක ලේකම් ගෝඨාභය රාජපක්ෂ ලෙස එකී උදවිය හුවා දක්වන්නේ තමන්ගේ ගාල්ලේ කාර්යාලය විවෘත කිරීමේ අවස්ථාවට ඔහු පැමිණි නිසා බවත්, එසේම කොළඹ කාර්යාලය විවෘත කිරීමේ අවස්ථාවට ඒ.ජේ.එම් මුසම්මිල් මහතාද එක්වූ බව ඔවුන්ට සිහිපත් කරදිය යුතුව ඇති බවත් විතානගේ මහතා සඳහන් කළේය.
තම සංවිධානය ‘ත්රස්තවාදී සංවිධානයක්‘ලෙස නම්කරනු ලැබූ උදවිය ඊට පෙරාතුව ජ.වි.පෙ, කොමියුනිස්ට් පක්ෂය,පො.එ.පෙ මෙන්ම එජාපයද එලෙසම නම්කර ඇති බවත්, ඒ අනුව මහින්ද රාජපක්ෂ, චන්ද්රිකා බණ්ඩාරනායක යන උදවිය පවා ‘ත්රස්තවාදීන්‘ විය යුතුව ඇති බවත් ඩිලන්ත විතානගේ මහතා වැඩිදුරටත් කියා සිටියේය.
