හරිත ගුවන් සේවා ක්ෂේත්‍රයේ (Green Aviation) සුවිශේෂී සන්ධිස්ථානයක් සනිටුහන් කරමින්, චීන වාණිජ ගුවන් යානා සංස්ථාව (COMAC) විසින් දේශීයව සංවර්ධනය කරන ලද 'CE-25A' විදුලි ගුවන් යානය සිය ප්‍රථම නියමුවන් සහිත පරීක්ෂණ පියාසැරිය (maiden piloted test flight) සාර්ථකව නිමවා තිබේ.

ශැන්ඩොං පළාතේ බින්ෂෝ හිදී මෙම පරීක්ෂණ පියාසැරිය සිදු කර ඇත.

රාත්තල් 22,000ක (ටොන් 10ක උපරිම ගුවන්ගත වීමේ බරකින් යුත්) මෙම යානය පියාසර කිරීම සඳහා නියමුවන් දෙදෙනෙකු සහ ගුවන් පරීක්ෂණ ඉංජිනේරුවරයෙකු සහභාගී වී තිබේ.

මුළු පරීක්ෂණ සැසිය පැයකට ආසන්න කාලයක් (මිනිත්තු 57කුත් තත්පර 46ක්) පැවැත්වූ අතර, ගුවන් යානය මිනිත්තු 16කට වැඩි කාලයක් සැබෑ ලෙසම අහසේ රැඳී සිටිමින් කිලෝමීටර 60.4ක දුරක් ආවරණය කර ඇත.

පියාසැරිය අතරතුර සියලුම පද්ධති සාමාන්‍ය පරිදි ක්‍රියාත්මක වූ බවත්, ගුවන් යානය අපේක්ෂිත ආකාරයටම හැසිරුණු බවත් ඉංජිනේරුවෝ වාර්තා කර ඇත.

මෙම මඟ සලකුණු සන්ධිස්ථානයට එළඹීමට පෙර, මෙම යානය මාස ගණනාවක් පුරා මිනිසුන් රහිත පරීක්ෂණවලට ලක් කර තිබේ. ඒ අනුව පෙබරවාරි 2 වන දින ප්‍රථම වරට ස්වයංක්‍රීයව පියාසර කළ මෙම යානය, මිනිසුන් රැගෙන යාමේ අනුමැතිය ලැබීමට පෙර ස්වයංක්‍රීය තහවුරු කිරීමේ පියාසැරි 19ක් සාර්ථකව අවසන් කර ඇත.

මෙම ව්‍යාපෘතිය COMAC ආයතනය, ප්‍රධාන බැටරි නිෂ්පාදක CATL, ෂැංහයි ජියාඕ ටොං විශ්වවිද්‍යාලය සහ තවත් හවුල්කරුවන් කිහිප දෙනෙකුගේ ඒකාබද්ධ උත්සාහයකි.

වාණිජමය වශයෙන් මගීන් ප්‍රවාහනය කිරීම සඳහා අනුමැතිය ලබා ගැනීමට පෙර අත්‍යවශ්‍ය නියාමන පියවරක් වන වර්ග සහතිකයක් (type certificate) සඳහා වන අයදුම්පත චීනයේ සිවිල් ගුවන් සේවා පරිපාලනය (CAAC) විසින් දැනටමත් විධිමත් ලෙස පිළිගෙන ඇත.

නගර අතර ගුවන් ගමන් සඳහා COMAC විසින් නිර්මාණය කරන ලද ප්‍රථම විදුලි වාණිජ ගුවන් යානය වන මෙය, මගීන් 19 දෙනෙකුට පහසුකම් සැලසිය හැක. පැයට කිලෝමීටර 300ක කෲස් වේගයකින් (cruising speed) සහ මීටර් 2,400ක උන්නතාංශයකින් ගමන් කළ හැකි මෙම යානයේ පරාසය (range) කිලෝමීටර 400කි.