ඉන්දියාවේ අසෑම් ප්‍රාන්තයේ කසිරංගා ජාතික වනෝද්‍යානය ආසන්නයේදී බස් රථයක් සහ බහාලුම් ප්‍රවාහන ට්‍රක් රථයක් මුහුණට මුහුණ ගැටීමෙන් සිදු වූ අනතුරකින් පුද්ගලයින් 23දෙනෙකු ජීවිතක්ෂයට පත්ව තවත් 20දෙනෙකු තුවාල ලබා තිබේ.
මියගිය පුද්ගලයින් අතර කාන්තාවන් දෙදෙනෙකු සිටින බවත්, ඔවුන්ගෙන් බොහෝ දෙනෙකු අධ්‍යයන කටයුතු අවසන් කර නැවත පැමිණෙමින් සිටි විශ්වවිද්‍යාල සිසුන් බවත් එරට පොලීසිය සඳහන් කරයි.
අනතුරින් තුවාල ලැබූවන් ප්‍රතිකාර සඳහා රෝහල්ගත කර ඇති අතර ඉන් කිහිප දෙනෙකුගේ තත්ත්වය බරපතළ බව ද සඳහන් වේ.
මේ අතර, මියගිය පුද්ගලයින්ගේ අනන්‍යතාව තහවුරු කිරීමේ කටයුතු සිදුකරමින් පවතින අතර, මරණ සංඛ්‍යාව තවදුරටත් ඉහළ යා හැකි බවට ද බලධාරීන් අනතුරු අඟවා තිබේ.
අනතුර සිදුවන අවස්ථාවේදී මගී බස් රථය ගෝලාඝාට් සිට නාගෝන් දක්වා ගමන් කරමින් තිබූ අතර, බහාලුම් ප්‍රවාහන ට්‍රක් රථය ඉහළ අසෑම් ප්‍රදේශය දෙසට ගමන් කරමින් තිබූ බව පොලීසිය සඳහන් කර සිටී.
ජාතික වනෝද්‍යානය ආසන්නයේ පනවා ඇති වේග සීමා නොතකා බස් රථය අධික වේගයෙන් ධාවනය කර ඇති බවත් ඒ හේතුවෙන් රියදුරුට රථය පාලනය කරගත නොහැකි වීමෙන් අනතුර සිදුවන්නට ඇති බවත් බලධාරීන් සැක පළ කරයි.
එමෙන්ම අනතුර සිදුවූ ආකාරය සහ මාර්ග නීති උල්ලංඝනය කර තිබේද යන්න සොයා බැලීම සඳහා විධිමත් පරීක්ෂණයක් පැවැත්වීමට ගෝලාඝාට් දිස්ත්‍රික් පරිපාලනය තීරණය කර තිබේ.
විශේෂයෙන්ම වාහනවල නියමිත ආසන සංඛ්‍යාවට වඩා වැඩි මගීන් පිරිසක් ප්‍රවාහනය කර තිබේද සහ කසිරංගා ජාතික වනෝද්‍යානය ආසන්නයේ නියමිත වේග සීමා ඉක්මවා ධාවනය කර තිබේද යන්න පිළිබඳව ද එහිදී විමර්ශනය කිරීමට නියමිතය.
