අනුරාධපුර පූජා භූමි සංවර්ධන සැලැස්ම පිළිබඳව යම් පාර්ශ්වයකට සැක සංකා පවතින්නේ නම් පූජා භූමි සංවර්ධන සැලැස්මේ සභාපතිත්වය දරන වැඩබලන අටමස්ථානාධිපති හිමියන්ගෙන් කරුණු පැහැදිලි කරගත හැකි බව අමාත්‍ය වෛද්‍ය නලින්ද ජයතිස්ස මහතා පවසයි.
අමාත්‍යවරයා මේ බව පැවසුවේ අද (10) පැවැති කැබිනට් තීරණ දැනුම්දීමේ මාධ්‍ය හමුවේදී අනුරාධපුර පූජා භූමියේ ආරම්භ කර ඇති පූජ්‍ය බලංගොඩ කස්සප හිමියන් ඇතුළු පිරිසගේ සත්‍යග්‍රහය පිළිබඳව අදහස් දක්වමිනි.
එහිදී අමාත්‍යවරයා පැවසුවේ මෙම සංවර්ධන සැලැස්ම සඳහා අවශ්‍ය තීන්දු තීරණ ගැනීම සඳහා උපදේශක සභාවක් පත් කර ඇති බවත් එහි සභාපති ලෙස වැඩබලන අටමස්ථානාධිපති හිමියන් සහ ජනාධිපති කාර්ය මණ්ඩල ප්‍රධානී ප්‍රභාත් චන්ද්‍රකීර්ති මහතාත් කටයුතු කරනු ඇති බවය.
කෙසේ නමුත් අදාළ පූජා භූමි සංවර්ධන සැලැස්ම පිළිබඳව සත්‍යග්‍රයේ නිරතවන පිරිසට කුමක් හෝ ගැටලුවක් ඇත්නම් වැඩබලන අටමස්ථානාධිපති අතිපූජ්‍ය ඊතලවැටුණු වැවේ ඥානතිලක නායක හිමිපානන් වහන්සේ මුණ ගැසී කරුණු දැනගත හැකි බවද අමාත්‍යවරයා වැඩිදුරටත් අදහස් දක්වමින් සඳහන් කළේය.
"අනුරාධපුර පූජා භූමි සංවර්ධන වැඩසටහනට අවශ්‍ය තීන්දු තීරණ ගැනීම සඳහා ජනාධිපති උපදේශක සභාවක් පත් කරලා තියෙනවා ඒකේ සභාපතිත්වය දරන්නේ වැඩබලන අටමස්ථානාධිපති අතිපූජ්‍ය ඊතලවැටුණු වැවේ ඥානතිලක නායක හාමුදුරුවොත් ජනාධිපති කාර්ය මණ්ඩල ප්‍රධානී ප්‍රභාත් චන්ද්‍රකීර්ති මහතාත් ඇතුළු 32 දෙනෙක් සාමාජිකත්වය දරන උපදේශක සභාවක් පත් කරලා තිබෙනවා මේ අනුරාධපුර පූජා භූමි සංවර්ධන වැඩසටහන වෙනුවෙන්. එතකොට කාට හරි ප්‍රශ්නයක් තිබෙනවානම් අපේ රුවන්වැලි නායක හාමුදුරුවෝ ප්‍රමුඛ නායක හාමුදුරුවන් වහන්සේලා මුණ ගැහිලා සාකච්ඡා කරන්න පුළුවන් තමන්ට තියෙන සැක සංකා පිළිබඳව.
කෙසේ නමුත් අනුරාධපුර පොලිසිය මූලස්ථාන පොලිස් අධිකාරීතුමා විසින් අලුත් බී වාර්තාවක් ඉදිරිපත් කරලා තියෙනවා අධිකරණ නියෝගයට අවනත නොවී මේ භූමියේ රැඳී සිටීම සම්බන්ධයෙන්. මේ අය රැඳී සිටින්නේ රථ ගාලේ නොවැම්බර් 20 අධිකරණය ඉදිරියේ මේ 5 දෙනෙකුට එරෙහිව පෙනී සිටින්න කියලා නියෝගයක් ලැබිලා තියෙනවා. ඊට අමතරව අත්අඩංගුවට ගත්ත පුද්ගලයාට ඉදිරිපත් කර තිබූ වෛද්‍ය වාර්තා අනුව ඔහු හෙරොයින් සහ ගංජා පානය කරලා තිබෙන බව අනාවරණය වෙලා තිබෙනවා. මේක තමයි එතන තියෙන තත්ත්වය. මේක අකුළ ගත්තොත් අපි ඊළඟ තැනත් එක්ක බලමු."
