විපක්ෂ නායක සජිත් ප්‍රේමදාස මහතා නැගූ වරප්‍රසාද ප්‍රශ්නයක් මුල් කරගනිමින් පාර්ලිමේන්තුව තුළ අද (03) උණුසුම් තත්ත්වයක් හට ගෙන ඇත.
කථානායකවරයාට එරෙහිව විපක්ෂය විසින් ඉදිරිපත් කර ඇති විශ්වාසභංග යෝජනාව විවාදයට නොගැනීම සම්බන්ධයෙන් විපක්ෂ නායක සජිත් ප්‍රේමදාස මහතා ඇතුළු විපක්ෂයේ මන්ත්‍රීවරුන් අද (03) පාර්ලිමේන්තුවේදී වරප්‍රසාද ප්‍රශ්න මතු කර තිබේ.
කෙසේ වෙතත්, එම වරප්‍රසාද ප්‍රශ්න මතු කිරීමට අවස්ථාව ලබා නොදීම සම්බන්ධයෙන් මෙලෙස උණුසුම් තත්ත්වයක් හටගත් අතර එහිදී විපක්ෂයේ මන්ත්‍රීවරුන් විරෝධතා පුවරු රැගෙන සභාගර්භය මැදට පැමිණ විරෝධතාවක නිරත විය.
මන්ත්‍රීවරුන්ට පාර්ලිමේන්තුව තුළ අදහස් ප්‍රකාශ කිරීමට සහ යෝජනා ඉදිරිපත් කිරීමට ඇති අයිතිය මෙන්ම, ස්ථාවර නියෝග අනුව කථානායකවරයාට එරෙහිව විශ්වාසභංග යෝජනාවක් ඉදිරිපත් කිරීමට ඇති අයිතිය සම්බන්ධයෙන් මෙම වරප්‍රසාද ප්‍රශ්නය ඉදිරිපත් කළ බව විපක්ෂ නායකවරයා මෙහිදී පැවසීය.
එබැවින් තමන්ට අදාළ වරප්‍රසාද ප්‍රශ්නය පාර්ලිමේන්තුව හමුවේ මතු කිරීමට අවස්ථාව ලබාදෙන ලෙස ඔහු නියෝජ්‍ය කථානායකවරයාගෙන් ඉල්ලීමක් කළේය.
තවද, වරප්‍රසාද ප්‍රශ්නය භාරදීම සඳහා කථානායකවරයාගේ කාර්යාලයට අද උදෑසන 9.15ට පැමිණෙන ලෙස තමන්ට වේලාවක් ලබාදී තිබුණ ද, කථානායකවරයා එම අවස්ථාවේ කාර්යාලයේ නොසිටි බව ද ඔහු පැවසීය.
ඒ අනුව, තමන්ට නියමිත ක්‍රමවේදය අනුව වරප්‍රසාද ප්‍රශ්නය භාරදීමට කටයුතු කළ බැවින්, එය පාර්ලිමේන්තුවේදී මතු කිරීමට අවස්ථාව ලබාදෙන ලෙස ඔහු යළිත් ඉල්ලා සිටි අතර එම අවස්ථාවේ මෙම උණුසුම් තත්ත්වය හට ගෙන තිබුණි.
