දිවයිනේ ප්‍රදේශ කිහිපයක සිදු වූ රිය අනතුරුවලින් තරුණයෙකු ඇතුළු පුද්ගලයින් පස්දෙනෙකු ජීවිතක්ෂයට පත්ව තිබේ.

බදුරලිය - මතුගම මාර්ගයේ කිලෝමීටර් 58 කණුව ආසන්නයේදී සිදු වූ අනතුරකින් තරුණයෙකු මියගොස් ඇත.

ලොරි රථයක් වෙළෙඳසැලක රථගාලට ඇතුළු කිරීමට යාමේදී ප්‍රතිවිරුද්ධ දෙසින් පැමිණි යතුරුපැදියක ගැටීමෙන් මෙම අනතුර සිදුව තිබේ.

අනතුරින් බරපතළ තුවාල ලැබූ යතුරුපැදිකරු බදුරලිය රෝහලට ඇතුළත් කරන විටත් මියගොස් සිට ඇති අතර, පසුපැදිකාරිය නාගොඩ රෝහලේ ප්‍රතිකාර ලබමින් සිටින බව පොලීසිය සඳහන් කරයි.

මෙලෙස මියගොස් ඇත්තේ බදුරලිය ප්‍රදේශයේ පදිංචිව සිටි 26 හැවිරිදි තරුණයෙකි.

අනතුරට සම්බන්ධ ලොරි රථයේ රියැදුරු අත්අඩංගුවට ගෙන ඇති අතර, බදුරලිය පොලීසිය වැඩිදුර විමර්ශන සිදු කරයි.

මේ අතර, අම්පාර - බිබිල මාර්ගයේ රත්මල්ගහඇල්ල ප්‍රදේශයේදී මාර්ගය අයිනේ රැඳී සිටි පුද්ගලයෙකු යතුරුපැදියක ගැටීමෙන් අනතුරක් සිදුව තිබේ.

අනතුරින් තුවාල ලැබූ එම පුද්ගලයා ඉඟිණියාගල රෝහලට ඇතුළත් කර ප්‍රතිකාර ලබමින් සිටියදී මියගොස් ඇත.

මෙලෙස මියගොස් ඇත්තේ රත්මල්ගහඇල්ල ප්‍රදේශයේ පදිංචිව සිටි 36 හැවිරිදි පුද්ගලයෙකි.

අනතුරට සම්බන්ධ යතුරුපැදිය පලාගොස් ඇති අතර, එහි රියැදුරු අත්අඩංගුවට ගැනීම සඳහා ඉඟිණියාගල පොලීසිය වැඩිදුර විමර්ශන ආරම්භ කර තිබේ.

මේ අතර, කොළඹ - මහනුවර ප්‍රධාන මාර්ගයේ කෑගල්ල අධිකරණ සංකීර්ණය අසලදී සිදු වූ අනතුරකින් කාන්තාවක් ජීවිතක්ෂයට පත්ව තිබේ.

මහනුවර දෙසට ධාවනය වූ පෞද්ගලික බස් රථයක් ඉදිරියෙන් ධාවනය වූ යතුරුපැදියක ගැටීමෙන් මෙම අනතුර සිදුව ඇත.

අනතුරින් යතුරුපැදිකරු සහ පසුපැදිකාරිය තුවාල ලබා කෑගල්ල රෝහලට ඇතුළත් කර ඇති අතර, එහිදී පසුපැදිකාරිය මියගොස් තිබේ.

මෙලෙස මියගොස් ඇත්තේ බුලත්සිංහල ප්‍රදේශයේ පදිංචිව සිටි 38 හැවිරිදි කාන්තාවකි.

මේ අතර, කන්දකැටිය ප්‍රදේශයේ මහියංගණය මාර්ගයේ 16 වැනි කණුව ආසන්නයේදී සිදු වූ අනතුරකින් ද පුද්ගලයෙකු ජීවිතක්ෂයට පත්ව තිබේ.

මහියංගණය දෙසට ධාවනය වූ කැබ් රථයක් රියැදුරුට පාලනය කරගත නොහැකිව මාර්ගයෙන් ඉවතට පැන පෙරළී යාමෙන් මෙම අනතුර සිදුව ඇත.

අනතුරින් කැබ් රථයේ රියැදුරු සහ පිටුපස ගමන් කළ පුද්ගලයෙකු බරපතළ තුවාල ලබා මීගහකිවුල රෝහලට ඇතුළත් කර ඇති අතර එහිදී පිටුපස අසුනේ ගමන් කළ පුද්ගලයා මියගොස් ඇත.

තුවාල ලැබූ රියැදුරු වැඩිදුර ප්‍රතිකාර සඳහා බදුල්ල රෝහලට මාරු කර යවා තිබේ.

මෙලෙස මියගොස් ඇත්තේ අරාව ප්‍රදේශයේ පදිංචිව සිටි 55 හැවිරිදි පුද්ගලයෙකි.

අනතුර සම්බන්ධයෙන් කන්දකැටිය පොලීසිය වැඩිදුර විමර්ශන සිදු කරයි.

එමෙන්ම, හාලිඇල - වැලිමඩ මාර්ගයේ හාලිඇල ප්‍රදේශයේදී සිදු වූ අනතුරකින් 73 හැවිරිදි පුද්ගලයෙකු ජීවිතක්ෂයට පත්ව තිබේ.

වැලිමඩ දෙසට ධාවනය වූ ත්‍රිරෝද රථයක් මාර්ගය හරහා ගමන් කරමින් සිටි පුද්ගලයෙකුගේ ගැටීමෙන් මෙම අනතුර සිදුව ඇත.

අනතුරින් බරපතළ තුවාල ලැබූ පදිකයා බදුල්ල රෝහලට ඇතුළත් කිරීමෙන් අනතුරුව මියගොස් තිබේ.

අනතුරට සම්බන්ධ ත්‍රිරෝද රථයේ රියැදුරු අත්අඩංගුවට ගෙන ඇති අතර, හාලිඇල පොලීසිය වැඩිදුර විමර්ශන සිදු කරයි.