ශ්‍රී ලංකාව හා එංගලන්තය සහභාගිත්වයෙන් පැවැති තුන්කොන් එක්දින ක්‍රිකට් තරගාවලියේ ශූරතාව තමන් සතුකර ගැනීමට සත්කාරක පාකිස්තාන කණ්ඩායම සමත්විය.
ඒ, ශ්‍රී ලංකා කණ්ඩායම ලබාදුන් ලකුණු 326ක ඉලක්කය හඹා යමිනි.
කාසියේ වාසිය දිනාගත් ශ්‍රී ලංකා කණ්ඩායම පළමුව පන්දුවට පහර දෙමින් ලකුණු 326ක ඉලක්කයක් ලබාදීමට සමත්වූවත්, පාකිස්තාන ආරම්භක පිතිකරු ෆකර් සමාන්ගේ විශිෂ්ට සහ ආක්‍රමණශීලී පිතිකරණය හේතුවෙන් ජයග්‍රහණය ශ්‍රී ලංකාවෙන් ගිලිහී ගියේය.
පාකිස්තාන ඉනිම ආරම්භ කරමින් පිටියට පිවිසි ෆකර් සමාන්, ශ්‍රී ලංකා පන්දු යවන්නන් දැඩි ප්‍රහාරයට ලක්කරමින් සිය එක්දින දිවියේ 12 වැනි ශතකය වාර්තා කිරීමට සමත්විය.
ඔහු පන්දු 99කින් ලකුණු 127ක් රැස්කළ අතර, එම ඉනිමට අලංකාර හයේ පහර 6ක් සහ හතරේ පහර 11ක් ඇතුළත් විය.
තරගයේ ආරම්භයේදී බාබර් අසාම් ඇතුළු පාකිස්තාන මුල්පෙළ කඩුලු 2ක් ලකුණු 14ක් තුළ දවාගනිමින් ශ්‍රී ලංකා පන්දු යවන්නෝ තරගයේ වාසිදායක තත්ත්වයක් හිමිකර ගැනීමට සමත්වූහ.
එහෙත්, තෙවැනි කඩුල්ල වෙනුවෙන් එක්වූ ෆකර් සමාන් සහ 19 හැවිරිදි නවක පිතිකරු සාද් බෙග් පන්දු 140කදී ලකුණු 149ක වටිනා සම්බන්ධතාවක් ගොඩනගමින් පාකිස්තාන කණ්ඩායම අවදානමෙන් මුදා ගත්හ.
මෙහිදී විශිෂ්ට ලෙස පන්දුවට පහරදුන් සාද් බෙග් පන්දු 75කදී ලකුණු 74ක් රැස් කර තිබියදී දැවී ගියද, අනතුරුව පිටියට පිවිසි සෙසු පිතිකරුවෝ ද වගකීමෙන් යුතුව ලකුණු රැස් කරමින් තරගයේ 49(48.3) වැනි පන්දුවාරය අවසානයේදී පාකිස්තානයට කඩුලු 3ක ජයක් ඒමට සමත්විය.
ශ්‍රී ලංකා පන්දු යවන්නන් අතුරින් සාර්ථකම පන්දු යවන්නා වූ ඩිල්ෂාන් මදුසංක, පන්දුවාර 9.3කදී ලකුණු 63කට කඩුලු 3ක් දවාගනිමින් පාකිස්තාන ඉනිමට යම් බලපෑමක් එල්ල කිරීමට සමත්වුවද, සෙසු පන්දු යවන්නන්ට පාකිස්තාන පිතිකරුවන් පාලනය කිරීමට නොහැකි විය.
මෙම පරාජයත් සමග තුන්කොන් එක්දින ක්‍රිකට් තරගාවලියේ ශූරතාව පාකිස්තානයට හිමිවූ අතර, ශ්‍රී ලංකාවට අනුශූරතාවෙන් සෑහීමකට පත්වීමට සිදුවිය.
