පූජ්‍ය ගලගොඩඅත්තේ ඥානසාර හිමියන්ට වහාම ජනාධිපති සමාව පිරිනමා පවතින අර්බුදය අවසන් කළ යුතු බව එක්සත් ජාතික පක්ෂය නිවේදනයක් නිකුත් කරමින් අවධාරණය කරයි.
ත්‍රෛනිකායික මහා නාහිමිවරුන්ගේ දැනුම්දීමට අනුව ඥානසාර හිමියන්ගේ නිදහස පතා පැවැත්වූ සත්‍යග්‍රහය මේ වන විට තාවකාලිකව අවසන් කිරීමට පියවර ගෙන ඇති බව එම නිවේදනයේ සඳහන් වේ.
හිටපු අග්‍ර විනිශ්චයකාර සරත් එන්. සිල්වා මහතාගේ නිගමනයට අනුව අධිකරණයට අපහාසකිරීමේ චෝදනාවකට ලබා දිය හැකි උපරිම සිරදඬුවම් කාලය මාස 18ක් වන අතර, ඥානසාර හිමියන් මේ වන විටත් මාස 10කට අධික කාලයක් බන්ධනාගාරගතව සිට ඇති බව ද එක්සත් ජාතික පක්ෂය පෙන්වා දෙයි.
-උපුටා ගැනීම-
ත්‍රෛනිකායික මහා නාහිමිවරුන්ගේ දැනුම්දීම අනුව ගලගොඩ අත්තේ ඥානසාර හිමියන්ට නිදහස පතා පැවැත් වූ සත්‍ය ග්‍රහය තාවකාලිකව අවසන් කිරීමට මේ වනවිට පියවර ගෙන තිබේ.
හිටපු අග්‍ර විනිශ්චයකාර සරත් එන්. සිල්වා මහතාගේ නිගමනයට අනුව අධිකරණයට අපහාස කිරීමේ චෝදනාවට උපරිම සිර දඬුවම් කාලය මාස 18 කි. එම වරදට ඥානසාර හිමියන් මාස 10 කට අධික කාලයක් බන්ධනාගාර ගතව සිට ඇත.
මහනායක හිමිවරුන්ගේ ඉල්ලීම අනුව ඥානසාර ස්වාමීන් වහන්සේට ජනාධිපති සමාව ලබාදීමට එදා පියවර ගත්තේය. ශ්‍රේෂ්ඨාධිකරණ තීන්දුවෙහිද ජනාධිපති සමාවක් යළි උන්වහන්සේ වෙත පිරිනැමීමට සලකා බැලිය හැකි බව සඳහන්ය.
ගලගොඩ අත්තේ ඥානසාර හිමියන්ගේ නිදහස වෙනුවෙන් පාගමනට සහ සත්‍ය ග්‍රහයට සහභාගී නොවූ භික්ෂූන් වහන්සේලාට එරෙහිවද උසාවි නියෝග ලබා ගැනීමට රජය ක්‍රියා කරනු ලැබීය. මේවා නොවිය යුතු බරපතළ වැරදිය. එසේම උන්වහන්සේගේ සිවුර ගලවා ඉවත් කිරීමට නියෝග දුන් අය සම්බන්ධයෙන් ද පරීක්ෂණයක් පැවැත්වීම සුදුසුය.
ත්‍රෛනිකායික මහා නාහිමිවරුන්ගේ ද මැදිහත් වීම යටතේ ගලගොඩ අත්තේ ඥානසාර ස්වාමීන් වහන්සේට වහාම ජනාධිපති සමාව පිරිනමා අර්බුධය අවසන් කළ යුතු බව එක්සත් ජාතික පක්ෂය දැඩිව අවධාරණය කර සිටී.
-උපුටා ගැනීම අවසන්-
