මේ දිනවල මාර්ග අනතුරුවල වැඩිවීමක් නිරීක්ෂණය වන බවත්, විශේෂයෙන්ම පවතින අයහපත් කාලගුණික තත්ත්වය හමුවේ සිදුවන බරපතළ අනතුරු කෙරෙහි පොලීසියේ විශේෂ අවධානය යොමුව ඇති බවත් රථවාහන භාර නියෝජ්‍ය පොලිස්පති W.P.J. සේනාධිර මහතා පවසයි.
අද (26) පැවැති මාධ්‍ය හමුවකට එක්වෙමින් ඒ මහතා සඳහන් කළේ, වර්ෂාව පවතින අවස්ථාවලදී මෙන්ම වර්ෂාවට පෙර පවතින අඳුරු කාලගුණික තත්ත්වයන් යටතේදීද රිය අනතුරු සිදුවීමේ අවදානම ඉහළ යන බවයි.
අයහපත් කාලගුණය සහ අඳුරු ස්වභාවය නිසා මාර්ගයේ දෘශ්‍යතාව අඩුවන බැවින් ඉදිරියෙන් පැමිණෙන වාහන හෝ මාර්ගයේ ඇති බාධක පැහැදිලිව හඳුනාගැනීම අපහසු වන බව ඔහු පැවසීය.
එම නිසා අධිවේගී මාර්ග භාවිත කරන රියදුරන් ඇතුළු සියලුම රියදුරන් අයහපත් කාලගුණය හමුවේ අධික වේගයෙන් රිය ධාවනය කිරීමෙන් වළකින ලෙස ඔහු පැවසීය.
එහිදී රියදුරන් සහ මගීන් හදිසි අවස්ථාවකදී පහසුවෙන් පාලනය කරගත හැකි ආරක්ෂිත වේගයකින් වාහන ධාවනය කිරීම,අධිවේගී මාර්ගවල සහ අනෙකුත් මාර්ගවල ගමන් ගන්නා සියලුම මගීන් නිසි ලෙස ආසන පටි පැළඳිය යුතු බව ඔහු පැවසීය.
එලෙසම දෘශ්‍යතාව අඩුවීම නිසා ඉදිරියෙන් සහ පසුපසින් එන වාහන නිරීක්ෂණය වීමේ අඩුවක් පවතින බැවින්, මංතීරුවල වාහන අතර ප්‍රමාණවත් ආරක්ෂිත ඉඩප්‍රමාණයක් පවත්වාගැනීම අවශ්‍ය බවද පැවසීය.
විශේෂයෙන්ම යතුරුපැදිකරුවන් ආරක්ෂිත හිස්වැසුම් පැළඳීම, රාත්‍රී සහ අඳුරු කාලගුණයේදී දෘශ්‍යතාව වැඩි කරන ආරක්ෂිත උපකරණ භාවිත කිරීම සහ අනෙකුත් වාහන සමග සුදුසු පරතරයක් තබාගැනීම අවශ්‍ය බවද පැවසීය.
අධික වේගය, අඩු දෘශ්‍යතාව සහ වර්ෂාව හේතුවෙන් මාර්ගයේ ඇතිවන අවදානම් නොසලකා හැරීම බරපතළ අනතුරුවලට හේතුවිය හැකි බැවින්, මාර්ග නීතිවලට අනුකූලව වඩාත් සැලකිලිමත්ව සහ ආරක්ෂිතව රිය ධාවනය කරන ලෙස නියෝජ්‍ය පොලිස්පතිවරයා සියලුම රියදුරන්ගෙන් වැඩිදුරටත් ඉල්ලා සිටියි.
