කොට්ටාව ප්‍රදේශයේ පෞද්ගලික අධ්‍යාපන ආයතනයක සිසුන් පිරිසක් සහ දෙමාපියන් රැගත් බස් රථයක් හබරාදූව දුම්රිය හරස් මාර්ගයකදී දුම්රියක ගැටීමෙන් සිදුවූ අනතුරින් සිසුන් 13 දෙනෙකු තුවාල ලබා ඇති බව රථවාහන පාලන හා මාර්ග ආරක්ෂාව දිසාව භාර නියෝජ්‍ය පොලිස්පති ඩබ්.පී.ජේ. සේනාධීර මහතා පවසයි.
එලෙසම එම අනතුර සිදුකළ බස් රථයේ රියදුරු අපරාධ චෝදනා යටතේ අධිකරණයට ඉදිරිපත් කිරීමට බලාපොරොත්තු වන බවද ඒ මහතා පැවසීය.
අද (26) පැවති මාධ්‍ය හමුවක් අමතමින් ඒ මහතා මේ බව සඳහන් කළේය.
ඊයේ (25) දින කොට්ටාව ප්‍රදේශයේ අධ්‍යාපන ආයතනයක සිසුන්, දෙමාපියන් සහ ගුරුවරුන් ඇතුළු 63 දෙනෙකුගෙන් යුත් කණ්ඩායමක් කෞතුකාගාරයක් නැරඹීම සඳහා කොග්ගල ප්‍රදේශයට ගොස් තිබුණි.
එදින පස්වරු 2.15ට පමණ නැවත පැමිණෙමින් තිබියදී, දුම්රිය හරස් මාර්ගයක අනතුරු ඇඟවීමේ විදුලි සංඥා සහ සීනුව ක්‍රියාත්මක වෙමින් තිබියදී බස් රථයේ රියදුරු එය නොතකා හරස් මාර්ගය හරහා රිය ධාවනය කිරීමට උත්සාහ කර ඇති බවද ඔහු පැවසීය.
දුම්රියක් පැමිණෙන බවට සිසුන් කෑගසා බස් රථය ඉදිරියට දැමීමෙන් වළකින ලෙස ඉල්ලා සිටියද, රියදුරු රිසිසේ බස් රථය ඉදිරියට ධාවනය කර ඇති අතර, එහිදී දුම්රිය බස් රථයේ පිටුපස කොටසේ ගැටී ඇති බව පැවසීය.
අනතුරින් තුවාල ලැබූ සිසුන් 13 දෙනෙකු කරාපිටිය රෝහලට ඇතුළත් කර ඇති අතර ඉන් එක් සිසුවෙකු සුවය ලබා පිටව ගොස් ඇති අතර, තවත් සිසුන් 8 දෙනෙකු තවමත් ප්‍රතිකාර ලබන බවද අනෙකුත් සිසුන්ට ද අවශ්‍ය ප්‍රතිකාර ලබා දී ඇති බවද ඔහු පැවසීය.
මෙම අනතුර සම්බන්ධයෙන් වැඩිදුර අදහස් දැක්වූ නියෝජ්‍ය පොලිස්පතිවරයා, මෙය මාරාන්තික "යාංගල්මෝදර දුම්රිය අනතුරට" සමාන වීමට ඉඩ තිබූ බරපතළ ඛේදවාචකයක් වුවද, වාසනාවකට මෙන් ජීවිත හානියක් සිදු නොවූ බව අවධාරණය කළේය.
ඒ අනුව,බස් රථයේ රියදුරුගේ බරපතළ අපරික්ෂාකාරී ධාවනය හේතුවෙන් ඔහු මේ වන විට මත්ද්‍රව්‍ය පරීක්ෂණයකට යොමු කර ඇති බවද රථවාහන දිශාව භාර නියෝජ්‍ය පොලිස්පතිවරයා වැඩිදුරටත් පැවසීය.
