අන්තර්ජාල ව්‍යාපාරයක් මගින් මුදල් ඉපයිය හැකි බව පවසා මුදල් වංචා කළ පුද්ගලයෙකු පරිගණක අපරාධ විමර්ශන අංශයේ වයඹ පළාත් ඒකකය විසින් අත්අඩංගුවට ගෙන තිබේ.
ටෙලිග්‍රෑම් හරහා සම්බන්ධ වූ පුද්ගලයෙකු විසින් අන්තර්ජාලය මගින් ව්‍යාපාර කර මුදල් ඉපයිය හැකි බව පවසා රුපියල් 12,691,033ක මුදලක් වංචා කිරීම සම්බන්ධයෙන් පැමිණිල්ලක් පරිගණක අපරාධ විමර්ශන අංශයේ වයඹ පළාත් ඒකකය වෙත යොමු වී තිබුණි.
අදාළ පැමිණිල්ල මත වයඹ පළාත් ඒකකය විසින් විමර්ශනයක් ආරම්භ කර කෙරුණු අතර ඒ අනුව වංචා කරන ලද මුදලින් රුපියල් ලක්ෂ 5ක මුදලක් තම බැංකු ගිණුම වෙත බැර කරවාගත් පුද්ගලයෙකු මුදල් වංචා කිරීම හා ආධාර අනුබල දීම සම්බන්ධයෙන් අත්අඩංගුවට ගෙන ඇත.
මෙලෙස අත්අඩංගුවට ගෙන ඇත්තේ අවුරුදු 36ක් වූ නවගත්තේගම ප්‍රදේශයේ පදිංචිකරුවෙකි.
පොලිසිය පැවසුවේ සිද්ධිය සම්බන්ධව පරිගණක අපරාධ විමර්ශන අංශයේ වයඹ පළාත් ඒකකය මගින් වැඩිදුර විමර්ශන සිදුකරන බවය.
