“වලානෙන් කියලා 15ක් විතර ආවා...ඒ ඇවිල්ලා කාවන්තිස්සට වෙඩිතිබ්බා කියලා,ඔයා වැරැද්ද පිළිගන්න ඕනේ කිව්වා. මහත්තයා කිව්වා මම නොකරපු දෙයක් කවදාවත් පිළිගන්න බෑ කියලා.
මමත් රජයේ සේවකයෙක් මගේ මහත්තයාත් රජයේ සේවකයෙක්. මට දරුවෝ දෙන්නෙක් ඉන්නවා. මගේ මහත්තයා අපරාධකාරයෙක් කියලා සමාජ මාධ්‍යයේ පළවෙනවා. අපි හතරදෙනාට සමාජයට මූණදෙන්න බැරි තත්ත්වයක් උදාවෙලා තියෙනවා මහත්තයෝ...මේක හරි අපරාධයක්.
මගේ මහත්තයා කවදාවත් එහෙම අපරාධයක් කරලා නෑ. අපි ලොකු වියදමක් දරලා අලි වැටක් ගහලා තියෙනවා. ඒ වගේ සත්තුන්ට අපි කවදාවත් එහෙම කරලා නෑ. මේක හරිම අසාධාරණයක්.
අපක්ෂපාතී පරීක්ෂණයක් කරලා සාධාරණයක් ඉෂ්ට කරලා දෙන්න කියලා රජයෙන් ඉල්ලනවා. මේ තියෙන්නේ බලපත්‍රය තියෙන තුවක්කුව. ඒකත් අරන් ගියා.”
මෙම ආයාචනය සිදුකරනු ලබන්නේ, කාවන්තිස්ස හස්තියාට වෙඩි තැබීමේ සිදුවීම සම්බන්ධයෙන් අත්අඩංගුවට ගත් ප්‍රධාන සැකකරුවන් දෙදෙනාගෙන් එක් අයෙකුගේ ආදරණීය බිරිඳ විසිනි.
ඇය සඳහන් කර සිටින්නේ, කිසිදු වරදක් නොකර හිතුමතේ තම ස්වාමියාව පොලීසියෙන් රැගෙන ගිය බවත් මේ සම්බන්ධයෙන් නිසි පරීක්ෂණයක් සිදුකර සාධාරණයක් ඉටුකර දෙන ලෙස රජයෙන් ඉල්ලා සිටින බවත්ය.
කාවන්තිස්ස ඇතාට වෙඩි තැබීමේ සිද්ධිය සම්බන්ධයෙන් වලාන මධ්‍යම දූෂණ මර්දන ප්‍රහාරක ඒකකය සහ වනජීවී දෙපාර්තමේන්තුව ඒකාබද්ධව සිදුකළ මෙහෙයුමකදී, අත්අඩංගුවට ගෙන අධිකරණයේ හමුවට ඉදිරිපත් කළ, ප්‍රාදේශීය ලේකම් කාර්යාලයක සේවය කරන නිපුණතා සංවර්ධන නිලධාරියෙකු සහ තවත් සැකකරුවෙකු මේ මස 28 වැනිදා දක්වා රක්ෂිත බන්ධනාගාර ගත කරන ලෙසට මහව මහෙස්ත්‍රාත් අනුරාධා සෙනෙවිරත්න මෙනවිය ඊයේ (19) නියෝග කළාය.
මෙම සිද්ධිය සම්බන්ධයෙන් තවදුරටත් විමර්ශන මෙහෙයවා එම විමර්ශනවල ප්‍රගතිය දැක්වෙන වාර්තාවක් අධිකරණය හමුවට ඉදිරිපත් කරන ලෙසටද මහෙස්ත්‍රාත්වරිය අඹන්පොළ පොලීසියට තව දුරටත් නියෝග කරනු ලැබුවාය.
මෙසේ නියෝග කළේ, කාවන්තිස්ස නමින් ප්‍රචලිත දළ හස්තියා ඝාතනය වීමේ සිද්ධිය සම්බන්ධයෙන් අඹන්පොල පොලීසිය බී වාර්තාවක් මඟින් අධිකරණයට කළ කරුණු දැක්වීමක් සැලකිල්ලට ගනිමින්ය.
අඹන්පොළ පොලීසිය අධිකරණයට කරුණු දක්වමින් පැවසුවේ, කාවන්තිස්ස නමින් ප්‍රචලිත ඇතා ඝාතනය කිරීමේ සිද්ධිය සම්බන්ධයෙන් වලාන දූෂණ මධ්‍යම ප්‍රහාරක ඒකකය සහ වනජීවී දෙපාර්තමේන්තුව ඒකාබද්ධ කළ මෙහෙයුමකදී මෙම සැකකරුවන් දෙදෙනා අත්අඩංගුවට ගත් බවය.
කාවන්තිස්ස ඇතා ඝාතනය කිරීමේ සිද්ධියට සම්බන්ධ සැකකරුවන් වහාම අත්අඩංගුවට ගෙන අධිකරණය හමුවට ඉදිරිපත් කරන ලෙස මීට පෙර ගල්ගමුව වැඩබලන මහෙස්ත්‍රාත් චතුරිකා හතුරුසිංහ මහත්මිය වනජීවී දෙපාර්තමේන්තුවට නියෝග නියෝග කරනු ලැබූවාය.
ඒ අනුව අධිකරණය ලබා දුන් නියෝගය මත වලාන මධ්‍යම දූෂණ මර්ධන ප්‍රහාරක ඒකකයේ අධ්‍යක්ෂ සහකාර පොලිස් අධිකාරී රොහාන් ඕලුගල මහතාගේ මෙහෙය වීම මත ක්‍රියාත්මක වූ විශේෂ පොලිස් කණ්ඩායමක් විසින් මෙම සැකකරුවන් අත්අඩංගුවට ගෙන තිබුණි.
කාවන්තිස්ස දළ ඇතා උස අඩි 11 අඟල් 3ක් සමන්විත වන අතර, ඔහුගේ දළ යුගළ අඩි 5යි අඟල් 1ක් දිග බවට වනජීවී දෙපාර්තමේන්තුව හඳුනාගෙන තිබේ. කාවන්තිස්ස අතාගේ බර කිලෝ 5000ක් 5500ක් පමණ වේ.
සැකකරුවන් දෙදෙනා සමඟ ඔවුන් සන්තකයේ තිබූ බෝර 12 වර්ගයේ තුවක්කු දෙකක්ද අත්අඩංගුවට ගත් බවද අධිකරණයට කියා සිටි පොලීසිය, මෙම සිද්ධි සම්බන්ධයෙන් තවදුරටත් විමර්ශන සිදුකරන බවද සඳහන් කළේය.
සිද්ධියට සම්බන්ධයෙන් තවත් සැකකරුවන් සිටීද යන්න පිළිබඳව ආනාවරණය කර ගැනීමට විමර්ශන සිදුකරන බවද සඳහන් කළ පොලීසිය සැකකරුවන් දෙදෙනාම රිමාන්ඩ් භාරයට පත්කරන ලෙසද අධිකරණයෙන් ඉල්ලා සිටියේය.
සැකකරුවෙන් වෙනුවෙන් අධිකරණය හමුවේ කරුණු දක්වමින් නීතිඥ උදය රාජපක්ෂ මහතා සඳහන් කළේ, සිය සේවාදායකයින් කාවන්තිස්ස ඇතාට වෙඩි තැබූ බවට පොලීසිය එල්ල කරන චෝදනා තරයේ ප්‍රතික්‍ෂේප කරන බවය.
කිසිදු සාක්ෂියක් නොමැතිව යම්කිසි පුද්ගලයෙකුගේ ප්‍රකාශයක් පදනම් කරගනිමින් තම සේවාදායකයින් අත්අඩංගුවට ගැනීම යුක්ති සහගත නොවන බවද නීතිඥවරයා කීවේය.
පොලීසිය පවසන පරිදි සැකකරුවන් සමඟ අත්අඩංගුවට ගත් ගිනිඅවි දෙක මෙම සැකකරුවන් දෙදෙනාට අයත් බලපත්‍ර සහිත නීත්‍යානුකූල ගිනිඅවි බවද අවධාරණය කළ උදය රාජපක්ෂ මහතා, කාවන්තිස්ස ඇතා ඝාතනය වීම සිද්ධිය සම්බන්ධයෙන් සමාජය තුළ ඇතිවී තිබෙන කැලඹිලි සහගත තත්ත්වය සමනය කිරීම සඳහා පොලීසිය මෙම සැකකරුවන් දෙදෙනා කිසිදු සාක්ෂියක් නොමැතිව නිකරුණේ අත්අඩංගුවට ගෙන ඇති බවටද චෝදනා කළේය.
තවදුරටත් අධිකරණය හමුවේ කරුණු දක්වමින් නීතිඥ උදය රාජපක්ෂ මහතා අධිකරණයෙන් ඉල්ලා සිටියේ, සිය සේවාදායකයින් ඕනෑම ඇප කොන්දේසියක් මත මුදා හරින ලෙසය.
මෙහිදී අලි ඇතුන් ආරක්ෂා කිරීමේ ලෝක සංවිධානයේ ශ්‍රී ලංකා ශාඛාව වෙනුවෙන් ජ්‍යෙෂ්ඨ නීතිඥ විජිත වික්‍රමනායක මහතාගේ උපදෙස් මත අධිකරණයට කරුණු දක්වමින් නීතිඥ සඳගිරි බණ්ඩාර මහතා ප්‍රකාශ කළේ, කාවන්තිස්ස ඇතාට වෙඩි තැබුවේ කවුරුන්ද යන්න පිළිබඳව අනාවරණය කරගෙන මෙම අපරාදේ සිදුකළේ කවුරුන්ද යන්න පිළිබඳව හෙළි කරගැනීමට පොලීසිය බැඳීසිටින බවය.
මෙම අපරාධය සම්බන්ධයෙන් සමාජය තුළ මහත් කැලඹීමක් ඇතිවී තිබෙනන බවද අවධාරණය කළ නීතීඥවරයා අවාසනාවන්ත ලෙස මියගිය කාවන්තිස්ස ඇතාට යුක්තිය ඉටුවීම පිණිස විධිමත් පරීක්‍ෂණයක අවශ්‍යතාවය දැඩිව පවතින බවද පැවසීය.
මෙසේ රක්ෂිත බන්ධනාගාර ගත කළේ, ඇහැටුවැව ප්‍රාදේශීය ලේකම් කාර්යාලයට අනුයුක්තව සේවය කරන නිපුණතා සංවර්ධන නිලධාරීවරයෙක් සහ තවත් සැකකරුවෙකි. ඔවුන් ඇහැටුවැව හුලුගල්ල ප්‍රදේශයේ පදිංචිකරුවෝ වෙති.
