රජය විසින් පාර්ලිමේන්තුවට ඉදිරිපත් කර ඇති ත්‍රස්තවාදයෙන් රාජ්‍ය ආරක්ෂා කිරීමේ නව පනත් කෙටුම්පත සම්බන්ධයෙන් මේ වන විට සමාජයේ පවතින මත සම්බන්ධව අද (20) පැවැති කැබිනට් තීරණ දැනුම්දීමේ මාධ්‍ය හමුවේදී අමාත්‍ය වෛද්‍ය නලින්ද ජයතිස්ස මහතා පැහැදිළි කිරීමක් සිදු කළේය.
නව පනත් කෙටුම්පත මගින් කොණ්ඩය වවා තිබීම, පච්ච කෙටීම වැනි සිදුවීම් හේතුවෙන් පුද්ගලයෙකු අත්අඩංගුවට ගැනීමට ඇති හැකියාවන් සමාජයේ පළවන මත සම්බන්ධයෙන් අමාත්‍යවරයා මෙම අදහස් පළ කළේය.
එහිදී ජනාධිපති නීතිඥ සාලිය පීරිස් මහතා සිය මුහුණු පොත තුළ මෙම නව පනත් කෙටුම්පත සම්බන්ධයෙන්ද දක්වා ඇති අදහස් සම්බන්ධවද අමාත්‍යවරයා පැහැදිළි කිරීමක් කළ අතර එහිදී ඔහු පැවසුවේ යම් අයෙකුට පනත් කෙටුම්පත සම්බන්ධව ගැටලු ඇත්නම් ශ්‍රේෂ්ඨාධිකරණය වෙත යාමට හැකි බවය.
ඒ අනුව ශ්‍රේෂ්ඨාධිකරණය අදාළ පනත් කෙටුම්පත සම්බන්ධව තීරණයක් ගනු ඇති බවද අමාත්‍යවරයා මෙහිදී අදහස් දක්වමින් සඳහන් කළේය
මේ සම්බන්ධව වැඩිදුරටත් අදහස් දැක්වූ කැබිනට් ප්‍රකාශක අමාත්‍ය වෛද්‍ය නලින්ද ජයතිස්ස මහතා,
"සාලිය පීරිස් මැතිතුමාම තේරුම් ගන්න ඕනේ එක්කෝ එතුමත් එක්ක ක්ෂේත්‍රයේ වැඩ කරන අය, එතුමා උගන්වපු අය ඇතුළත්ව තමයි මේ පනත් කෙටුම්පත සකස් කරන්නේ. ඒක නිසා ඔය පච්චයක් කොටපු කෙනෙක්, කොණ්ඩයක් වවපු කෙනෙක් ඇතුළට ගනී කියන එක වගේ දෙයක් ඔය පනතට දාන්නේ නෑ කියන එක එතුමා තේරුම් ගන්න ඕනේ. අනිත් එක එහෙම තිබෙනවානම් ඕනම කෙනෙකුට පුළුවන් ශ්‍රේෂ්ඨාධිකරණයට ගිහිල්ලා මේක අභියෝගයට ලක් කරන්න. ඒක තමයි හොඳම දේ. ඒ නිසා ඔය ගැන මාධ්‍යයේ කියනවාට වඩා ශ්‍රේෂ්ඨාධිකරණයට ගිහින් අභියෝගයට ලක් කරන්න එතකොට ශ්‍රේෂ්ඨාධිකරණය තීන්දු කරයි එවැනි වගන්තිවලට මොකද කරන්න ඕනේ කියන එක. පනත සම්පූර්ණයෙන්ම සමස්තයක් හැටියට ගන්න එහෙම නැත්නම් ඔයවගේ කරුණක් දෙකක් අරගෙන එහෙම කරන්න අයිතියක් නෑ. මොකද අපි ත්‍රස්තවාදය වැළැක්වීමේ පනත අහෝසි කරපු ආණ්ඩුයක් අපි. PTA එක අහෝසි කරලා රාජ්‍ය ත්‍රස්තවාදයෙන් වැළැක්වීමේ පනත් කෙටුම්පත ගේන්නෙම මානව හිමිකම් ද ආරක්ෂා කරමින් රාජ්‍ය ත්‍රස්දවාදයෙන් ආරක්ෂා කිරීමේ නීතිමය රාමුව හදන්න. "
