මිහින්තලය මිහිඳු මහ සෑයේ අභිනව කොත්වහන්සේ සහ චූඩා මාණික්‍යය නිරාවරණය කිරීමේ පිංකම අද (18) පස්වරු 1ට යෙදෙන සුබ මොහොතින් සිදුකිරීම නියමිතයි.
ඒ, මිහිඳු මහරහතන් වහන්සේගේ පරිනිර්වාණය සිදුවී අද දිනයට වසර 2286ක් සපීරීම නිමිතිකරගනිමිනි.
අනුබුදු මිහිඳු මා හිමියන් විසින් උතුම් බුදු දහම මෙරටට රැගෙන ආ පුදබිම ලෙස මිහින්තලයට බෞද්ධ පුදබිම් අතර හිමිවන්නේ ප්‍රමුඛස්ථානයකි.
මිහිඳු මහරහතන් වහන්සේගේ පරිනිර්වාණය සිදුවී අදට වසර 2286ක් සපිරෙයි.
ඒ නිමිත්තෙන් ඓතිහාසික මිහින්තලා පුදබිමේ මිහිඳු සෑරදුට පැළඳවීම සඳහා කොත් වහන්සේ සහ චූඩා මාණික්‍යය මෙරටට වැඩම කරවූයේ තායිලන්තයේ සිටයි.
තායිලන්තයේ නියෝජ්‍ය අගමැතිනිය ඇතුළු එරට සැදැහැවතුන්ගේ ධන පරිත්‍යාගයෙන් මෙරටට පූජා කෙරුණු කොත් වහන්සේ සහ චූඩා මාණික්‍යෙය් මූල්‍ය වටිනාකම රුපියල් ලක්ෂ 1,170ක් ඉක්මවනු ලබයි.
දෙරණ මාධ්‍ය ජාලයේ පූර්ණ මාධ්‍ය අනුග්‍රාහකත්වයෙන් සිදුකෙරෙන මෙම පුණ්‍ය කටයුත්තේදී කොත් වහන්සේ සහ චූඩා මාණික්‍යය පළමුව වැඩමකෙරුණේ මරදානේ පිහිටි දෙරණ ප්‍රධාන කාර්යාලයටයි.
ශ්‍රී ලංකාවේ තායිලන්ත තානාපතිවරයාගේ සුරතින් මිහින්තලා රජමහා විහාරාධිපති ආචාර්ය පූජ්‍ය වලවාහැංගුණවැවේ ධම්මරතන හිමියන් වෙත කොත්වහන්සේ සහ චූඩාමාණික්‍යය එහිදී නිල වශයෙන් පූජාකෙරුණි.
අනතුරුව මිහින්තලා රජමහා විහාරය දක්වා වැඩම කරවන ගමන්මගේදී කොත්වහන්සේ සහ චූඩා මාණික්‍යය කඩවත රන්මුතුගල රජමහා විහාරයේදී, කුරුණෑගල ඇත්කඳ රජමහා විහාරයේදී මෙන්ම ගලේවෙල ධර්මදූත බෞද්ධ මධ්‍යස්ථානයේදීත් සැදැහැවතුන්ට වන්දනාමාන කිරීම සදහා අවස්ථාව සැලසුණි.
අනතුරුව ඔක්තෝබර් 9 වැනිදා සිට 13 වැනිදා දක්වා ඓතිහාසික මිහින්තලා රජමහා විහාරස්ථානයේ සැදැහැවතුන්ගේ වන්දනාමානය වෙනුවෙන් තැන්පත් කිරීමෙන් අනතුරුව, කොත්වහන්සේ මිහිඳු මහා සෑ රදුන්ට පැළඳවීම සිදුකරෙුණි.
ඒ අනුව, කොත්වහන්සේ නිරාවරණය කිරීම මෙන්ම චූඩාමාණික්‍යය පැළඳවීම මිහිඳු මහරහතන් වහන්සේගේ පරිනිර්වාණය සිදුවී වසර 2286ක් සපිරෙන අද පස්වරු 01.00 ට යෙදෙන සුබ මොහොතින් ත්‍රෛනිකායික නාහිමිවරුන්ගේ ප්‍රධානත්වයෙන් සිදුකිරීමට නියමිතයි.
