පූජ්‍ය ගලගොඩඅත්තේ ඥානසාර හිමිගේ සිද්ධිය පදනම් කරගනිමින් එක්සත් ජාතික පක්ෂය (UNP) විසින් යොමුකළ නිවේදනයට, අධිකරණ අමාත්‍ය හර්ෂණ නානායක්කාර මහතා විසින් අද (15) පිළිතුරු ලිපියක් යොමුකර තිබේ.
ඒකාබද්ධ විපක්ෂයේ කැඳවුම්කරු මහචාර්ය ජී.එල්. පීරිස් මහතා සිදුකළ ප්‍රකාශයක් උපුටා දක්වමින් එක්සත් ජාතික පක්ෂය ඊයේ (14) එම නිවේදනය නිකුත් කළේය.
බන්ධනාගාරගත කර සිටින භික්ෂූන් වහන්සේලා ප්‍රමුඛ ආගමික නායකයින් පිටතට රැගෙන යාමේදී ඇඳ සිටිය යුතු ඇඳුම සම්බන්ධයෙන් අනුගමනය කළ යුතු විධිවිධාන සියල්ලක්ම බන්ධනාගාර දෙපාර්තමේන්තු නිත්‍ය නියෝගවල දැනටමත් පැහැදිලිවම සඳහන් බව අදාළ නිවේදනයෙන් පෙන්වා දී තිබුණි.
බන්ධනාගාර දෙපාර්තමේන්තු නිත්‍ය නියෝගවල මේ කරුණ සම්බන්ධයෙන් පැහැදිලිවම සෘජු මඟ පෙන්වීමක් කර තිබියදී ඒ ගැන නිර්දේශ ඉදිරිපත් කිරීම සඳහා කමිටුව පත් කිරීම හිතාමතාම ප්‍රශ්නය යට ගැසීමට සහ තව තවත් ඇදගෙනයාමට ගත් වංක ප්‍රයත්නයක් බවත් එම නිවේදනයෙන් පැවසීය.
රජයේ මේ පියවර තම පක්ෂය දැඩි පිළිකුලෙන් හෙළා දකින බවත්, රජය කළ යුතුව ඇත්තේ ගලගොඩඅත්තේ ඥානසාර ස්ථවීරයන්ගේ සිවුර ගලවා ඉවත් කිරීම පිළිබඳ සියම් මහා නිකායේ කෝට්ටේ ශ්‍රී කල්‍යාණී සාමග්‍රි ධර්ම මහා සංඝ සභාවේ මහනායක හිමියන් සහ සංඝසභාව හමුවට ගොස් සමාව අයැද සිටීම බවද එහි දක්වා තිබුණි.
කෙසේ නමුත් එම නිවේදනයේ හිතාමතාම උක්ත කරුණු තහවුරු කිරීම පිණිස බන්ධනාගාර නිත්‍ය නියෝග අංක 550 හි එක් කොටසක් පමණක් උපුටා දක්වා මහජනතාව නොමග යවන සුළු විකෘති අදහසක් ඉදිරිපත් කර තිබීමක් බව අධිකරණ අමාත්‍යවරයා සිය පිළිතුරු ලිපියේ සඳහන් කර ඇත.
සිර දඬුවම් විඳින භික්ෂූන් වහන්සේ නමකට අදාළ කරුණක් වැනි සමාජයට සංවේදී කරුණක් අරභයා මෙවැනි විකෘති සහගත අදහසක් සමාජගත කිරීමට වගකීම් සහගත දේශපාලන පක්ෂයක් කටයුතු කිරීම කනගාටුදායක තත්වයක් බව හෙතෙම පෙන්වා දෙයි.
නීතිමය විධි විධානයක එක් කොටසක් පමණක් පදනම් කර ගනිමින් කරුණු ඉදිරිපත් කිරීම තුළ වැරදි හෝ අසම්පූර්ණ අවබෝධයක් ඇති විය හැකි බව නීතිය පිළිබඳ අවම හෝ අවබෝධයක් සහිත අයෙකුට අවබෝධ විය යුතු කරුණකි.
එම මාධ්‍ය නිවේදනයේ නොමග යවන සුළු තත්ත්වයක් නිර්මාණය වන්නේ අදාළ නිත්‍ය නියෝගයේ සම්පූර්ණ අන්තර්ගතය ඉදිරිපත් නොකිරීම සහ ඥානසාර හිමියන්ට ලැබී ඇති සිර දඬුවමේ කාලසීමාව සැලකිල්ලට නොගනිමින් කරුණු ඉදිරිපත් කිරීම බවත් දක්වා ඇත.
අධිකරණ අමාත්‍ය හර්ෂණ නානායක්කාර මහතාගේ ලිපිය
